Shillong, Risaw, 01: U Dr DD Lapang uba long u Myntri Rangbah barim ka jylla bad uba la long ruh u riewsaiñ pyrthei uba la slem bha ha kane ka jylla ha ka sngi Baar u la pynbna ba un shongthait noh kum u Nongaibuit jong ka Sorkar Meghalaya.
Ha ka shithi ba la phah sha u Myntri Rangbah ka Jylla u Conrad K. Sangma, u Dr. Lapang u la ong, “da ka jingsngew ba jylliew jong ka jingpyrkhat bad ka jingsngewnguh ba nga pynbna ba nga la shongthait noh na ka kam Adviser jong ka Sorkar Meghalaya.
U la ong, “Ka jingïaid lynti jong nga ha kaba shakri ïa ki paidbah ka Meghalaya kam shym la duna ïa ka jingkylla. Nga la ïohi ïa ka jylla ba ka la nang kiew bad nga sngew sarong shibun eh ban long shi bynta jong ka jingkiew. Ki jingeh kiba la ïakynduh ki long ki lad ki lynti kiba la pynkylla dur bad uwei pa uwei u mawjam u dei ka lynnong bathymmai jong ka jinghikai.
“Katba nga dang ai khublei, nga kwah ban pynpaw ïa ka jingsngewnguh kaba khraw na ka bynta ka jingshaniah bad ki lad ki lynti ba la ai ha nga. Nga iehnoh shadien ym tang ïa ki paralok hynrei ïa ka iing ka sem kaba la ieng ha syndah jong nga lyngba ki jingeh kiba nga ïakynduh. Sngewbha pdiang ïa kane kum ka shithi iehnoh kam jong nga. Khublei shibun ïa ki jingkynmaw baroh,” la pynpaw u Dr Lapang ha ka shithi.
