Shillong, Jymmang, 17: Ka jingpynher stet jong ki nongñiah thuk thuk ar shaka ka la buh jingma haduh katta katta ïa ki nongleit nongwan bad dang ha ka sngi Thohdieng mynta ka taiew, u Bah Davin Kharsyntiew u rangbah uba don hapdeng ka jinglong tymmen bad uba ju im kamai jakpoh da ki phew phew snem lyngba ka kam die kotkhubor na kawei ka thliew iing sha kawei pat u la mynsaw jur hadien ba u la shah syllad ha kawei ka Motor Bike KTM rong lieh bym lah ban tip ïa u number plate.
Katkum ka jingïathuh ki bahaiing, u Bah Kharsyntiew u la ngat ha kane ka jingjia ha ka surok ban kiew sha FCI Godown ha ka por kumba 9:30 baje mynstep katba u dang mih na kawei ka iing kaba u dang shu dep sam kot khubor.
Une u rangbah mynta u don hapdeng ka jingmynsaw na ka kjat kadiang bad um lah ïaid shuh wat tang ban leit bylla.
Lyngba ka jingthoh ba la pynsaphriang ha ka Social Media ki khun ki kti jong u Bah Davin Kharsyntiew ki la kyrpad ïa u nongñiah jong ka MotorBike KTM uba ïaid lynti na Nongmali-3 ban kiew sha FCI Godown uba la kum lymbub bad phet bak khlem da ieng satia hadien kane ka jingjia ba un shu wan panmab khlem da donkam ban siew bai dawai.
Ki khun ki kti ki la kyrpad ruh ïa u nongñiah jong ka Motorbike KTM ynda u la ïohi ïa kane ka khubor un ïoh ban telephone ha u nombar: 7005300957.
 | ReplyForwardAdd reaction |
