Shillong, Rymphang, 08: San ngut ki snar nongtuh thuk thuk ar shaka ki la shah kem ha ki Pulit jong ka North Garo Hills District ha ka jingpynap shrip ha ka sngi Saitjaiñ hadien ba ki Pulit ka Matia Police Station, Goalpara, Assam ki la ïoh pdiang ïa ka jingujor halor ka jingshah tuh ki thuk thuk ar shaka.
Lyngba ka jingïoh jingtip kaba bniah na ki tnat syntiat, ki Pulit ki la pynlong ïa ka jingpynap shrip hapoh ka jingïalam jong u Incharge ka Dainadubi Police Out Post bad ki Pulit ka Jylla Assam ha kaba ki Pulit ki la ïoh bat ïa kawei ka thuk thuk Pulsar kaba don ïa u number AS-18K-3422 ha Wageasi.
Hadien kane, ki Pulit ki la lap sa ïa kawei pat ka thuk thuk ar shaka kaba don ïa u number AS-01FF-1309 na iew Gairong. Ha ka jingtohkit kaba bniah ki Pulit ki la ïohkem ïa ki san ngut ki briew kiba donkti ha kaba ki la phla ba ki la thmu ban kit ïa kine ki thuk thuk ar shaka sha Rongara na ka bynta ban die tuh sha ka ri Bangladesh.
Ki san ngut ki snar tuh thuk thuk ki dei kiba la tip kyrteng kum u Rockystar M. Sangma na Bagmara, u Sanstar A. Sangma na Bagmara, u Fozirul Haque na Sidabari, Goalpara, Assam, u Rofiqul Ali uba ju tip ruh kum u Nabar Ali na ka shnnong Nayapara, Digpara, Matia Police Station bad u Rakibul Islam na ka shnong Nagarbera (Paharpara), Assam.
Ïa kine ki san ngut la aiti noh sha ki Pulit jong ka Matia Police Station Goalpara District, Assam ba kin pynlong shuh shuh ïa ka jingtohkit kaba bniah.
