Shillong, Naitung, 11: I Meiieid Kmoiñ Wahlang iba long kawei na ki nongiamareh Marathon na ka shnong Shngimawleiñ South West Khasi Hills District iba la don mynta 76 snem ka rta ba la paw bha ha kane ka jylla Meghalaya bad ha ka ri India da ka mynsiem kaba sngewkmen i la pan jingkyrshan na ki paidbah nongshong shnong jong ka jylla ha shwa ba in leit iashim bynta ha ka jingiakob mareh marathon ka ban sa long ha ka ri Australia.
Ha ka jingiakren bad ki lad pathai khubor ha ka sngi Palei i Meiieid Kmoiñ Wahlang i la khublei ia u Bah Binning Lyngkhoi uba long u nongprat lynti ha ka jingmareh marathon bad kumjuh ia kiwei pat ki riewrangbah kiba ju don ryngkat bad i haduh kine ki sngi.
Ha kane ka kynti, i meiieid Kmoiñ Wahlang i la kyrpad ia ki paidbah nongshong shnong jong ka jylla Meghalaya ba kin buh jingduwai lem na ka bynta jong i khnang ba kan ym don kano kano ka jingshah pynthud bad ka jingshah pynwit naduh ka sngi ba in sa mih na la ing ban leit sha Australia bad ban wan phai ruh da ka met kaba koit ba khiah.
Kum ka longkmie na ka thaiñ nongkyndong kaba duna ha ka jingnang jingstad bad ha ka ioh ka kot, i meieid Kmoiñ Wahlang i la kyrpad ruh ia ki paidbah kiba lah ban ai jingiarap ha kino kino ki bynta namarba ka jinglut jingsep ha kane ka kynti ruh ka long kaba bun.
