Shillong, ïaïong, 05: Ha ka jingpynap shrip ha ka sngi Thohdieng ki shipai BSF ka Meghalaya Frontier, ki la ïoh kurup bun bah ki mar khaii tuh bad ïa ki masi ba la thmu ban shalan sha ka ri Bangladesh lyngba ka khappud.
Lyngba ka jingïoh jingtip na ki tnat syntiat, ki shipai BSF da ka jingïatreilang bad ki Pulit ki la pynlong ka jingpynap shrip ha khappud ban khanglad ïa ka jingkhaii tuh. Ïa ki mar khaii tuh ba kynthup ïa ki masi, ka kiad bad kiwei kiwei ki mat kiba kot palat T. 40 lak.
Shwa kane, ha ka sngi Palei, ki shipai BSF jong ka 4th Battalion kiba la ïoh jingtip na ki tnat syntiat ha ka jingpynap shrip ki la ïohkem saw ngut ki thei Bangladeshi ryngkat bad u nongïalam lynti uba dei u nong India na East Khasi Hills District katba ki dang pyrshang ban jam beaiñ shapoh u pud u sam jong ka ri India lyngba ka khappud jong ka jylla Meghalaya.
Ïa kine kiba la shah kem ryngkat bad ki tiar ba la kurup la aiti noh sha ki Pulit ka Pynursla Police Station ban leh ïa kaba donkam katkum ki kyndon jong ka aiñ.
Naduh u bnai Kyllalyngkot, 2025, ki shipai BSF ki la ïoh kem 78 ngut ki mynder Bangladeshi da ka jingpeitngor baroh arphew saw kynta ban khanglad ïa ka jingrung tuh jong ki mynder na Bangladesh sha u pud u sam jong ka ri India.
