Shillong, Jymmang, 06: U Symbud Myntri Rangbah ka Jylla uba khmih ïa ka tnat Kam Pohing Bah Prestone Tynsong ha ka sngi Baar u la ïai ban ba ka Sorkar Jylla kan sngap shwa ïa ka sur jong kiba bun balang shwa ban shim rai halor ka jingpynpoi ïa ka lynti Rel.
Ha ka jingïakren bad ki lad pathai khubor, u Bah Tynsong u la ong ba u Myntri ka Sorkar Pdeng uba khmih ïa ka tnat Rel u la pynpaw ba ka Sorkar India ka da angnud ban pynïasoh ïa ka jylla Meghalaya bad ka lynti Rel.
“Ïa kane la leh ym na ka bynta ka jingmyntoi jong ki, hynrei na ka bynta ka jingmyntoi jong ki paidbah nongshong shnong ka jylla,” u la bynrap.
Ha kaba ïadei bad kane, u Bah Tynsong u la ïathuh ba u Myntri Rangbah dang shen u la thaw ïa ka All Party Committee bad shen un sa khot ïa ka jingïalang bad ki kynhun bapher bapher ban pynthikna ba ka dei ban don ka jingïakren kaba shai halor kane ka mat shwa ba ka Sorkar kan shim ïa ka rai.
Shuh shuh u Symbud Myntri Rangbah u la ong ba ka jylla Meghalaya ka la donkam shisha ïa ka lynti Rel.
“Ha lade shimet nga sngew donkam ïa ka lynti Rel hynrei whaba nga ong ngi donkam ïa ka lynti Rel, ngi donkam ban ïasyllok shwa. Kam mut pat ba nga ong ba kan urlong beit. Namarkata, halor kane ka mat, ngin ïathir sani bha bad ngin shim rai ba baroh ki nongmihkhmat na ki seng saiñpyrthei bapher bapher ki dei ban don lang.”
Haba kylli, hato ka Sorkar kan pdiang neem ban wanrah da ka Rel kit mar, u Bah Tynsong u la ong, “na kata ka daw ngin hap ban ïakynduh lang ban ïakren. Ynda ngi la ïathir sani bha bad ki kynhun bapher bapher, hangta ngin sa sngewthuh kiei ki jingduna bad kaei ka jingeh bad ngin sa shim rai la ka long neem ban pyntyllun shakhmat ïa kane ka sobjek.”
U Bah Tynsong u la kubur ba donkam ïa ki aiñ ba pyrkhing ïa ka jingwanrung jong ki briew kiba nabar haba pyntreikam ïa ki projek kiba heh ha ka jylla bad ong ruh dei na kata ka daw ba ka Sorkar Meghalaya ka la dawa ba dei ban pyntreikam noh mardor ïa ka Inner Line Permit (ILP) ha ka jylla.
“Ka Iingdorbar Thawaiñ ka la mynjur ïa ka rai ba ngi kwah ïa ka ILP. Ha kajuh ka por, ngin sa ïakynduh shwa ïa ki kynhun bapher bapher bad ngin ïakren ïa ka sobjek halor ka lynti Rel nalor kiwei kiwei de ki mat,” u la ong.
Shuh shuh u Bah Tynsong u la ong ba um don eiei ban kynthoh halor ka jingshim rai jong ka Voice of the People Party ban ym ïashim bynta ha ka jingïalang jong ka All Party Committee on Railways ka ban sa long ha ki khyndiat sngi ban sa wan.
 | ReplyForwardAdd reaction |
