Shillong, Risaw 17: U MLA ka 18 West Shillong Constituency na ka seng UDP, uba long ruh u Adviser ka tnat Social Welfare bad u Myntri Sorkar barim u Bah Paul Lyngdoh ha ka sngi Thohdieng u la leit ban jngoh bad jurip ïa ki jaka bapher bapher hapoh ka constituency, khamtam ha ki bynta jong ka Stand Jeep, ka Qualapaty bad u la pynthikna ban pynkloi ïa ki projek kiba ïadei bad ki surok, ki nala um bad ka jingsam umbam umdih khnang ba kin long kiba khuid, bad na ka liang jong u, u la jurip ruh ïa ka surok bad ki nala kiba la lang um bad kumjuh ruh ka jingpei jong ki pipe um ha kane ka thaiñ.
Ha kane ka sngi ïa u MLA la donlang da ki heh Sorkar na ki tnat bapher bapher ha ka jingdonlang ki nongïalam ka Synjuk 10 Dorbar ha ka jingdonlang u Chairman u Bah Wanjop Pyrnot uba long ruh u Rangbah Shnong ka Mawprem bad ki Myntri ka Hima Mylliem nalor kiwei kiwei.
Haba kren sha ki lad pathai khubor u Bah Paul u la ong, “Nga dap da ka jingsngewkmen ban pyntip bad phi ba ngi la mynjur ban pynsted ïa kane ka kam katba lah bad shwa kane ka aïom lehkmen Khrismas.”
U Bah Paul u la pynpaw ba kiba bun ki bynta jong ka kam ki dei kiba la kynthup lang ha ka projek pynbha bad pynitynnad ïa ka Ïewduh ha ka jinglut kaba la mang T.25 klur ïa kaba la pynbna da u Myntri Rangbah ka jylla ha ki katto katne bnai ba la dep bad kumjuh ruh ka jingwan jngoh hi dalade ïa ka Ïewduh.
Haba ïadei bad kane u Bah Paul u la ong, “Kawei pat ka bynta ka dei shaphang ka jingpynthymmai ïa ka surok bah kaba la don lypa. Ngi sngewkmen ba ka NHIDCL ka la ai jingkyrshan pura. Ki la pynkhreh ïa ka jingkheiñ jingdiah na ka bynta kane ka jingpynbha bad pynthymmai ïa ka surok kaba la don lypa bad tang hapoh lai taïew, ki lah dei ban khot Tender ban pyntrei ïa ka surok.”
Ha kane ka sngi u MLA ula shong bishar kam ruh ïa ki jingujor na ki Dorbar Shnong ha kaba ïadei bad ki jingtei ba la shna da ka Meghalaya Urban Development Authority (MUDA) ha Qualapaty kiba la sah khongreng khlem da don briew ba pyndonkam mynta la bun snem.
Kum u MLA u la pyntip ruh ba un sa lum ka jingïalang bad u Chairman ka MUDA ban wad ïa ka lad lynti ban weng noh mardor ïa ka jingeh, la ka long da kaba khang tala ïa ki dukan (stall) ne pynpra ïa ki ne ailad ïa u Contractor ban pyndep ïa ka kam bad nangta ban ailad ïa ki nongshong dukan, kaba mut mano mano ba pynïaid ïa kine ki dukan ban shimti mardor.
U Bah Paul u la pynthikna ruh ba ka kam kan sdang nohshen da kaba pynpaw ïa ka jingkyrmen, ba dei ban lah ban pynkut noh shwa ban kut ka aïom Khristmas 2025.
