Shillong, Jylliew, 27: U nongaiktien jong ka Sorkar MDA u Bah Paul Lyngdoh uba long ruh u Myntri ka Sorkar Jylla u la ong ba ka Sorkar ka la trei shitom ban weng ïa ki jingïakajia pud bad ka jylla Assam.
U la ong ba ka Sorkar ka la shim ïa ki sienjem ba kongsan bha ban peit ïa kane ka jingeh, naduh kaba phah ïa ki kynhun Pulit bad ki Magistrate ban ïapynibor bad ki Pulit, ki Magistrate na ka jylla Assam haba jubab ïa ka jingkynnoh ba ka Sorkar kam shym la leh eiei halor ka jingkyntur pud da ka Assam ha ka shnong Lapangap, West Jaiñtia Hills District.
“Jin lada ka Sorkar kam salia, ngin ym phah satia ïa ka kynhun Pulit, ngin ym phah hi ruh ïa ki Magistrate ban ïa pynibor bad ki Pulit, ki Magistrate na ka Jylla Assam. Namarkata, ka long ka bym lah ban pdiang ban ong ba ka Sorkar ka shu pyni kam malu mala,” ong u Bah Paul ha ka jingïakren bad ki lad pathai khubor.
U Myntri u la pyntip ruh ba ïa ka Memorandum of Understanding (MoU) yn sa ïasoi bad ka Sorkar Assam hashwa ka 15 tarik Nailar, ha kaba yn sa ïohi ïa ki san tylli ki shnong ba thymmai ki ban sa hap hapoh u pud u sam jong ka jylla Meghalaya.
Ha kaba ïadei bad ka Langpih Sector, u Bah Paul u la ong ba ka jingïakren ka la jan poi artat sha kaba kut. U la ïathuh ba ïa ka joint inspection yn hap ban ïa pynbeit lang, bad mynta u dang ap ktien na u Patowari uba khlieh ïa ka Committee na ka bynta ka Langpih Sector na ka jylla Assam.
U la ong ruh ba ka kam jong ka Jaiñtia Hills Sector ka la nang tyllun shakhmat.
U la ïathuh ba ka Sorkar ka la ïaid shakhmat ban ïa pynbeit ïa ka jingïakynad ha khapud, ym kum ha ki por kiba ladep haba kam don kano kano ka jingpynibor haba don ka jingshah kyntur u pud u sam jong ka jylla Meghalaya.
