Shillong, Jylliew, 02: Ka Sorkar Meghalaya bad Assam ha ka Lah Sngi u Blei ki la rai ban sieh noh ïa ki mawpud ha ki hynriew tylli ki jaka ba don hapdeng ka jingïakajia pud, ïa kiba ladep ban ïapynbeit bad ba ladep ban ïasoi ïa ka soskular ïasngewthuh jingmut (MoU).
U Myntri Rangbah ka Jylla Meghalaya u Conrad K.Sangma ha ka jingïakren bad ki lad pathai khubor hadien ba la ai ka jinglang bad u Myntri Rangbah ka Jylla Assam u Himanta Sarma, u la ong ba ki don katto katne ki bynta ha Gijang bad Tarabari, ïa kiba yn hap ban pynbeit shwa da ka Meghalaya, shwa ban sieh ïa ki mawpud.
“Ngi la jan dep ban shim rai na ka bynta ban sieh ïa ki mawpud bad nga sngewkmen ban pyntip sha phi ba la kumno kumno, ha lane shwa ka 15 tarik, Nailar,, ngin sa lah ban pynbeit bad ban shim rai ban sieh noh ïa ki mawpud ha ki san tylli ki jaka ba ïakajia pud,” la ong u Sangma.
Kane kan long ka sienjam kaba khraw bad kawei pat ka sakhi kaba skhem ha ka jingïadei paralok bad ka jylla Assam”, u la bynrap. U la pyntip ruh ba ka jingïakren halor ki hynriew tylli ki jaka ba dang don ha ka jingïakajia pud kan dang ïai bteng.
Ha kaba iadei bad ka Kulsi Multi-purpose Irrigation bad ka Hydroelectric Power Project, ki ar tylli ki jylla ki la iakren bad mynjur ban don ka jingpynmih lang ia ka bording, ynda ladep iasyllok lang bad ki paidbah.
