Shillong, Nailar, 11: Ki paidbah nongshong shnong jong ka shnong Maikhuli, ka shnong kaba dang hap ha Ribhoi District, ki la byrngem ban jynrat naphang ïa ki ar tylli ki nar post electrik ba la sieh beaiñ da ka Assam State Electricity Board (ASEB) ha ka 9 tarik, mynta u bnai ha u pud u sam jong ka shnong.
Kane ka jingwan sieh ïa ki nar post electrict ka la pynmih ïa ka jingïakynad bad ka thma ktien kaba jur bha hapdeng ki paidbah ka shnong Maikhuli bad ki paidbah nongshong shnong ka jylla Assam.
Ka jingpyrshah jong ki paidbah ka shnong Maikhuli ka long naduh ka sngi ba ka Assam State Electricity Board (ASEB) ka la sieh ïa ki nar post electrict bad ha kajuh ka por ka Dorbar Shnong ka la pyntip ruh sha ki bor synshar ka Ribhoi District halor kane ka jingjia hynrei da ka jingpynibor jong ki briew na ka jylla Assam ka jingïakynad ka la nang jur kat haduh ba ki Magistrate bad ki Pulit na Ri Bhoi District bad na Kamrup District ki la hap ban hiar sha ka shnong Maikhuli ban tem ïa ka jingïakynad.
La ïathuh shuh shuh ba ka jingïakynad bad ka thma ktien ka la mih tang na ka daw ka jingpynsngewthuh bakla da u Madhav Deka uba sah ha ka jylla Assam uba la ïalam bakla lut ïa ki paidbah na ki shnong khappud ka Assam, watla ïa kane ka kam ladei ban ïakren pynbeit da ki bor synshar district jong ka Ribhoi bad ka Kamrup.
Ki paidbah ka shnong Maikhuli, ki la dawa ïa u Deputy Commissioner ka Ribhoi District ban ïakren pynbeit bad Deputy Commissioner ka Kamrup District hynrei lym kumta ki la byrngem ban jynrat hi da ka bor namarba ïa ki post electrict la sieh beaiñ da ka Assam sha u pud u sam ka shnong Maikhuli kaba dang hap ha ka jylla Meghalaya.
