Shillong, Nailar, 13: Ki MDC ka Liang Pyrshah ka Trinamool Congress (TMC) ha ka sngi Balang ki la ïasnohkti lang ha ka jingïakhih kaba dang ïaid shakhmat jong ki nongtrei jong ka Garo Hills Autonomous District Council (GHADC), kiba la dawa ban siew noh ïa ka tulop jong ki mynta la palat 43 bnai.
Ka jingïakhih, kaba la lamkhmat da ka Non-Gazetted Employees Association (NGEA), ka la kynjoh mynta sha ka sngi kaba 34 ha kaba ka ophis treikam jong ka GHADC ka la khang na ka daw ka jingbym don jong ki nongtrei.
U MDC na Rongrong Constituency u Rinaldo K. Sangma u la pynpaw ïa ka jingïasnohkti lang bad ki nongtrei da kaba pynpaw ba ki MDC ka TMC kin ïai bteng ban kyrshan ïa ki jingdawa jong ki haduh ban da urlong.
“Ki nongtrei ki la ïakhih da kaba jaijar mynta la palat shi bnai, bad ki MDC ka TMC ki la ïasnohkti lang bad ki ban phah ïa ka khubor kaba tyngeh sha ka Sorkar bad sha ka Executive Committee (EC) ban pyllait noh mardor ïa ka tulop ba dang sahteng la palat 43 bnai sha ki nongtrei ka GHADC. Katba ka jingdawa kam pat urlong ngin bteng ïa ki jingïakhih jong ngi bad ngin ieng ryngkat bad ki nongtrei,” u la ong.
“Nalor kata, ngi dawa ruh ban pynjari noh mardor ïa ka Garo Customary Law, kiba la sahkut ha ka tnad District Council Affairs (DCA) bad ban pynbeit khatduh noh ïa ki thup kyrteng jong ki nongthep vote na ka bynta ka GHADC, kaba la sahteng la slem bha,” bynrap biang u Sangma.
Ka GHADC ka mad ïa ka jingeh kaba jur bha ha ka liang ka pisa bad ka donkam ïa ka pisa kaba kot haduh T.252 klur ban siew ïa ka tulop ba sahteng bad ban pyntreikam ïa ka 5th Pay Commission kaba la sahteng la slem bha.
