Shillong, Risaw, 31: Ka Village Defence Primary Committee Nongstoiñ Area (VDPCNA) ha ka sngi Palei ka la leit ban pynsngew bad ban pan jingïarap na ka Director General of Police (DGP) jong ka Jylla ka Kong Idashisha Nongrang ba kan wad ïa ki lad ki lynti ha kaba ïadei bad ka jinghap leit ai sakhi bun bun sien da ki dkhot ka VDP ha Iingbishar halor ki kam runar bapher bapher.
Ha ka jingïakren bad ki lad pathai khubor u President jong ka VDPCNA u Bah Mawkordor Kharsyiemlieh, u la ong, “ki don katto katne ki bynta ba ngi sngew duh mynsiem namarba ngi hap leit ai sakhi ha Kashari lada ïohkem ïa ki briew kiba donkti ha ka POCSO Case, jingshah pynïap briew, ka jingïohkem ïa ki nongkhaii drok. Bun na ki dkhot jong ngi, ki don beit ïa ka case kaba ki hap ban leit ai sakhi hakkhmat ka Ingbishar. Tang ma nga marwei, nga don haduh 18 tylli ki case ba nga hap ban leit ai sakhi. Ki case ki poi da ki phew tylli kat haduh ba ngim don por shuh wat tang ban leit bylla leit sngi.”
“Ka DGP ka la ong ba kan sa ïarap khnang ba ngin leit ai sakhi ha Iingbishar tang shi sien ïa kano kano ka case hynrei ba ngin leit bunsien, ka ktah palat ïa ngi,” u la ong.
“Ka DGP ka ladep ïakren ba ïa ki POCSO Case bad ki kam pynïap briew ngin leit (ai sakhi ha Ingbishar) tang shi sien namarba ka Ingbishar kam da kham pdiang ïa ka sakhi ba la ai da ka tnat Pulit hynrei ka pdiang ïa kaba leit mih hi ha Ingbishar,” la ïathuh u Bah Kharsyiemlieh.
Katkum ka jingïathuh jong u President ka VDPCNA kaba kham jwat ka dei ka case ïohkem drok. “Ngi hap ban leit ai sakhi (ha Ingbishar) ar sien lai sien. Na ka bynta ka jingbha jong ki paidbah, ngim salia. Ngi ki VDP ha West Khasi Hills ngi la shah byrngem la bunsien ha ki nongleh kam sniew. Watla ngi la shah byrngem katno katno ruh ngim sngew eiei, katba nang shah byrngem katta nang sngewbang ban treikam,” la ïathuh shuh shuh u Bah Kharsyiemlieh.
U la ïathuh hadien ba la thaw ïa ka VDPCNA ha u snem 2019 kum ka kynhun ki la ïohkem ïa uwei u runar leh be-ijot da ka jingïatreilang bad ka tnat Pulit.
U la ong ba wat ki jingjia pynïap briew ruh kum ka kynhun ka la trei shitom ban ïatreilang bad ki pulit bad kaba kham jur bha mynta ka dei u drok.
“Ha u snem 2019 ngim ïoh thiah ïoh dem shuh haba ngi ïakhun ïa u drok. Ka jingïakhun ka la seisoh bha ha kaba ki don ki khynnah kiba ju mlien ban dih drok mynta ki la kylla bamut. Ynda ngi la kem ïa ki nong dih drok ngi ai jingïasyllok da kaba khot lang ïa ki kmie ki kpa,” ula ong bad bynrap, ‘ha Nongstoiñ bun na ki nongdih drok kiba la kylla kaba mut.”
“Hynrei mynta patde la mih sa ki riewthymmai bad ha ki khyndiat sngi ngi dang ïohkem ïa ki nongdih drok, ïa kiba die be-ain ïa ka kiad ruh ngi dang kem, ïa kiba ïaid khlemakor sha surok, sha lynti sha syngkien ruh ngi dang kem,’ la ïathuh u Bah Kharsyiemlieh bad bynrap, namar ka jingkynrei ki nongtuh nongthiem kum ka kynhun ki la ïaid pahara mynmiet bad ki Pulit la ar bnai ban tem ïa ki kam runar ruser. Ka Nongstoiñ mynta ka la kham duna ka jingkynrei ki nongtuh namarba ka VDP ka trei borbah bad ki Pulit.
Ka VDPCNA ka la pynsngew ha ka DGP ïa ka Honorarium kaba ju siew sha ki VDP mynshwa 300 marwei hynrei naduh u snem 2010 ym shym la siew shuh sha ki VDP.
“Ngi la ïakren bad ka DGP ban pyllait noh ïa ka Honorarium kaba la kyntiew mynta na ka T. 300 sha ka T.3000 hajar bad ka DGP ka la ai ka jingkular namarba ka kwah ba ka tnat Pulit kan ïatreilang bad ki VDP ha ka jylla baroh kawei,” la pyntip u Bah Kharsyiemlieh.
U la pyntip ruh ba ka DGP ka la kular ban sa aiti ïa ki Vest sha ki VDP ha ka jylla baroh kawei ban phong ha ka por ba ki leit pahara bad ki bor Pulit ha kano kano ka por.
