Shillong, Jylliew, 09: Ka Federation of Khasi Jaiñtia and Garo People (FKJGP) Central Body, ka la pyrshang ban bishar bniah ïa ki jinglong jingman bad ki jingshah kynthoh kiba bun lyngba ki lad pathai khubor na rithor, rynsan Social Media bapher bapher bad khamtam eh na ki bahaing hasem jong ki shijur na Indore, Madhya Pradesh halor ka jingïap jong u Raja Raghuvanshi bad ka jingjah rngai jong ka Sonam Raghuvanshi ha kine ki khyndiat taiew ba ladep.
“Ka FKJGP ka phah ïa ka kyrwoh sha ka Sorkar Jylla ba ka dei ban shim ïa kane ka jingjia kum u dieng sympat……….katba ngi dang ap ïa ka jingbit na ka Sorkar Kmie ban pyntreikam ïa ka ILP (Inner line Permit, Bengal Eastern Frontier Regulation Act 1873) dei ban pyntreikam noh mardor shwa ïa ka Principal Act jong ka MRSSA 2016 kaba la don lypa ïa ki kyndon ban khanglad bad ban wanrah ïa ka jingshngaiñ ym tang ïa ki trai ri trai muluk hynrei wat ïa kiba wan sha ka jylla ruh haba ki wan da ka lynti kaba dei la ka long ïa ki nongjngohkai pyrthei, kiba wan bylla, kiba wan pule bad kumjuh ruh kiba wan ban trei ïa ki kam ha ki tnad bapher bapher jong ka Sorkar Jylla, Sorkar Pdeng, ki Private Sector lane ki Company wat ha ki Bank ruh kumjuh bad ba bunsien ïa ki kam sniew kam lute kiba ja bunsien ki dei kiba leh da ki riew bymman na shabar jylla namar haduh mynta ngi kum ka jylla ngim pat don ki aiñ kiba paka ban ïada ne khanglad ïa kum kine ki kam sniew ha ka jylla ka jong ngi,” ong u kyrwoh ba la phah da u President ka FKJGP u Bah Dundee Cliff Khongsit.
Ka FKJGP ka kyntu ruh ïa baroh ki seng saiñpyrthei ba kin ieng tylli kawei ban wanrah ïa ki aiñ ki ban ai ka jingïada bad ka jingshngaiñ ym tang ïa ki trai ri trai muluk da kaba klet noh shipor ïa ka jingkwah burom, jingsngew pher saiñhima bad kumta ter ter, hynrei ban saiñdur ïa ka jylla hi baroh kawei nangne shakhmat.
Ha kane ka kynti, ka seng kam banse ban mih shakhmat ban pynpaw ïa ka jingsngewkhia kaba khraw ïa ki jingshah pharep ki bym shong nongrim jong ki trai ri trai muluk, kiba lah ruh ban ktah ïa ka shongsuk shong shngaiñ bad ka jingsngew syier bad jynjar jingmut jong ki para ri na ka jylla kiba shong basah sha kiwei pat ki jylla bapher bapher jong ri India, ong ka seng ha u kyrwoh ba la phah sha ki lad pathai khubor.
Ka seng ka sngewba kum kitei ki jingshah kynnoh kiba laiphewjait ki la pynbudnam sniew ym tang ïa ka shnong Sohra hynrei ïa ka jylla hi baroh kawei.
Ka FKJGP ka ai khublei kyrpang ïa ka Sorkar Jylla khamtam ïa ka tnat Pulit kaba la shimkhia ban tih tynrai ïa ka dawbah jong ka jingïap jong u Raja Raghuvanshi tad haduh ban da ïohkem ïa ka kurim ka jong u ka Sonam Raghuvanshi lem bad ïa kiwei pat kiba donkti ka kam bymman.
Ka seng ka la kyntu ruh ïa ka Sorkar ba ka dei ban pynshitom ïa baroh kiba donkti ha kane ka kam bad ban shim da ki sienjam kiba tyngeh ïa kiba la kynthoh tohmet bad kren da ki kyntien kiba kynshoit ïa ka jingsngewpher jaitbynriew ban pynbud nam sniew ïa ka jylla.
“Kumba ki bor Pulit ki ju kem ïa kiba bun ki khun samla trai ri trai muluk kiba kynthoh ha ki rynsan Social Media ïa ki jingjia ki bapher bapher ha ka jylla bad ha ka ri India, ki bor Pulit ki dei ruh ban leh kumjuh ïa ki briew kiba nabar kiba kren sniew, kiba kynshoit bad kiba kynthoh khlem nongrim ïa ka shnong sohra bad ïa ka jylla hi baroh kawei,” la dawa ka FKJGP.
