Shillong, Rymphang, 12: Ki ar ngut ki Kñi bad uwei uba la shah kynnoh donkti lang, ha ka sngi Palei ki la leit ïalam ïa ki Pulit sha ka jaka ba la kynnoh ba ki la pynïap ïa u Bah Kerang Sawkmie ha kawei ka jaka khlaw ka bym da jngai kaba don hapoh u pud u sam jong ka shnong Nongthymmai, Eastern West Khasi Hills District.
Ka jingïalam jong ki Pulit ïa kine ki lai ngut sha kane ka jaka ka long hadien ba ka Kashari ka la aibor ïa ki Pulit ba kin pynlong ïa ka jingtohkit kaba bniah lai sngi kynthih.
Kum ban shu pynkynnmaw hangne ba ka kmie bad ki bahaïng ki la ong ba u Bah Kerang u la leit sha khlaw naduh ka 6 tarik Rymphang, 2026 hynrei namarba um wan phai shuh sha la ïing ha ka 9 tarik Rymphang, 2026 ki la leit wad sha khlaw bad ki la lap ïa ka jaka kaba i phylla bad kumta ki pyntip noh sha ki bor synshar shnong bad ha kajuh ka por ki la ujor ruh da ka ejahar sha ki Pulit ka Mairang Police Station.
Haduh mynta, ki Pulit kim pat lap satia ïa ka met jong u Bah Kerang watla ki arngut ki Kñi ki la phla ha ki Pulit ba ki la bret ïa ka met ha kawei ka wah kaba long thwei kaba don hapoh shnong.
Katkum ka jingphla jong ki Kñi, la suba ba ïa ka met jong u Bah Kerang la thang ha ka ding bad hadien kata ïa ki shyieng la bret sha wah.
