Shillong, Nailar 25 : U Superintendent of Police Eastern West Khasi Hills District u la phah ia ka kyrwoh khubor ban pyntip ba ha ka 18 tarik u Nailar 2025, ki pulit ki la ioh ia kawei ka jingujor ba kawei ka khynnah kaba dang 17 snem ka rta kaba la tip kyrteng kum ka Ribaiahun Marngar kaba na ka shnong Permadan ka la jah rngai naduh ka 15 tarik u Nailar 2025 ha ka por 10 baje eiei na ka dukan kaba ka trei kaba don ha ka shnong Permadan.
Ka kyrwoh khubor na u SP ka la ong ba la suba ba katei ka khynnah ka la shah rahbor ha uwei u briew uba la tip kyrteng kum u Thomborlang Sohphoh uba na ka shnong Umdum bad haduh mynta ruh ym pat tip shano kine ki ar ngut ki don. Kumta ki pulit ki la register Case ia kane ha Mairang Police Station katkum ki kyndon jong ka BNS.
Katkum ka jingbatai ki pulit ki la ong ba kane ka khynnah kaba dang 17 snem ka don ia ka rynieng kaba 5 phut , u shniuh rong iong bad la iohi khatduh ba ka phong ia ka sopti rong lieh, ka sopti kaba don dak khlur ba iong bad ka jainkyrshah kaba saw bthuh laiñ rong lieh bad ka patlun rong iong. Lada don kino kino kiba iohi la kyrpad ba kin pyntip da kaba phone sha u number 6009308959 bad ia kiba pyntip yn buhrieh. Kane ka long katkum ka kyrwoh na u SP Eastern West Khasi Hills.
