Shillong, Naitung, 05: Ar tylli ki kynhun ïalehkai phutbol na them Ri Bhoi kiba kynthup ïa ka Mawtneng Upper Primary and Secondary School ha ka kyrdan Under-15 ha ka liang jong ki shynrang, ka Nongjri Presbyterian Higher Secondary School ha ka kyrdan Under-17 ha ka liang ki kynthei bad ka North Liberty Higher Secondary School kin ïoh mihkhmat ïa ka jylla Meghalaya sha ka lympung ïalehkai Subroto Mukherjee Cup 2025.
Ka Mawtneng UP and Secondary School na Ri Bhoi ka la lah ban pynliem noh ïa ka Government Boys’ Higher Secondary School na West Jaiñtia hills ha ka kyrdan Under-15 Boys katba ka Nongjri Presbyterian Higher Secondary School na Ri Bhoi ka la pynliem noh ïa ka Tyrsad Higher Secondary School ha ka kyrdan Under-17 jong ki kynthei bad ka North Liberty Higher Secondary school na West Jaiñtia Hills ka la pynliem noh ïa ka Nongjri Presbyterian Secondary School ha ka Under-17 jong ki shynrang.
Ïa ki khusnam la sam sha ki nongjop ha kane ka sngi da u President jong ka MFA u Bah Hamletson Dohling uba long ruh u nongaibuit jong u Myntri Rangbah ka Jylla.
