Shillong, Ïaïong 13: Kawei ka samla ka la duh noh ïa la ka jingim bad uwei pat u samla u la mynsaw jur hadien ba ka Scooty kaba ki shong kaba don ïa u number ML 05-AA-9898 ka la shah tynrah nadien ha kawei ka trok kaba la pynher stet bha katba ki dang wan phai na Umroi Umdohbyrthih ban leit sha Umroi Nongrah.
Ïa ka samla kaba la khladnoh la tip kyrteng kum ka Sidora Langstieh, 29 snem na ka shnong Nongsder Block-B bad u nongñiah jong ka Scooty la tip kyrteng kum u Rai Sing Laloo, 30 snem ka rta na ka shnong Umroi Nongrah.
Kane ka la jia ha ka surok Shillong By-pass hajan ka Tyndai Resort ha ka sngi u Blei ha ka por 4:00 baje eiei janmiet ha kaba ka Scooty ka la pra lyngkhot lyngkhai bad hadien kane ka jingjia ka trok ka la phet krad.
Katkum ka jingtip ba la ïohlum la ïathuh ba ki Pulit ka Khapmara PIC ki la hiar mardor sha katei ka jaka ban pynlong ïa ka jingtohkit bad lap ba ka samla Sidora Langstieh ka khlad hashen bad u nongñiah ïa ka scooty u la mynsaw jur ha kaba ki la rah noh mardor sha CHC Bhoirymbong ban ïoh ïa ka jingsumar bad ïa ka samla ba la khlad noh la pynkit sha Civil Hospital Nongpoh ban pyndep ïa ka Postmortem.
Ka tyllong khubor ba la ïoh lum ka ong ruh ba ki Pulit ka Khapmara PIC bad Umïam Police Station ki la shimkhia ban thwet ïa ka trok kaba la phet krad ha kaba ki la pyntip ïa ki Pulit sha Mawryngkneng bad Mawlasnai hynrei haduh mynta kim shym la ïoh bat satia ïa ka trok kaba tynrah ïa ki ar ngut kiba shong da ka Scooty.
