Shillong, Rymphang, 20: Da ka jingkyrkhu U Blei, ka iing ka sem jong u Bah Stephan Rymbai ka la pidang ïa ka iingsah kaba thymmai ïa kaba la plie paidbah ha ka 18 tarik mynta u bnai da u Director jong ka Jaiñtia Hills Development Society u Fr. Manbha Pakem.
U Bah Stephan Rymbai bad ka Kong Risibil Lamare ki dei ki nongshong shnong jong ka shnong Moobakhon kaba hap hapoh ka West Jaiñtia Hills District ki don saw ngut ki khun hynrei u Bah Stephan u la duh noh ïa ki tylli ki kti mynta la kumba 15 snem eiei na ka daw jong ka jingshah bat ha ka bording elektrik.
Baroh shikatta kane ka longiing kam shym la don ïa ka iingsah kaba paka hynrei ki la shu sah ha iing jong ka hymmen ka Kong Risibil Lamare.
Dei ha u Naiwieng jong u snem 2024 ba ka Jaiñtia Hills Development Society ka la ïohi ïa ka jingeh jong kane ka longing kumta da ka jingkyrshan jong ka kynhun KHUBLEI Germany, ka Jaiñtia Hills Development Society ka la sdang ban kner ïa ki jingïarap sha kane ka longing ba shem jynjar.
Ïa ka iing la shna da ka jingïarap pisa da ka Petra Mayer na ka Ri Germany bad la pyntrei ïa ka iing da ka Jaiñtia Hills Development Society kawei na ki seng treimon sngewbha ba la paw bha ha rilum Jaiñtia.
Shuwa ban aiti ïa kane ka iing, la pynlong ïa ka jingïalang kaba lyngkot ha kaba la sakhi lang da ki dkhot jong ka Jaiñtia Hills Development Society, katto katne ki riewngeit jong ka Balang Presbyterian Moobakhon bad shwa ban aiti ïa kane ka ing, la pynlong ïa ki jingduwai bad ki jingkyrkhu kyrdoh da u Fr. Manbha Pakem ryngkat ka jingdonlang jong u Fr. Simeon Sungoh uba long u Parish Priest jong ka Namdong Parish.
Na ka liang jong u Bah Stephan Rymbai u la ai khublei ïa ki nongïarap, kyrpang eh ïa ka Jaiñtïa Hills Development Society kaba la shim ïa kane ka sienjam ban pynïoh ïa iing ka sem jong u da ka iing kaba thymmai na ka bynta jong ki.
