Shillong, Rymphang 18: Ki Pulit ki la syrtap ha ka shnong Mawngap Khlieh Shnong ha ka sngi Baar ban peitngor ba kan nym mih kano kano ka jingkulmar ha ka por ba pynlong ïa ka elekshon jied Rangbah Shnong ha kane ka shnong ïa kaba la pynïaid da ka Hima Mawphlang ryngkat ka jingdon jong ki ophisar ka Khasi Hills Autonomous District Council (KHADC) kum ki nongpeit pyrman.
Ki don 202 ngut kiba lah ban thep ïa ka Vote jong ki hapoh ka shnong Mawngap Khliehshnong hynrei kiba leit thep ïa ka vote ki don tang kumba 51 ngut eiei katba 150 ngut tam pat kim shym la treh ban thep ïa ka vote kum ka dak ban pyrshah ïa ka jingbym ailad jong u Lyngdoh ka Hima Mawphlang ïa u Rangbah Shnong barim u Bah Khambor Kharshandi ba un thep kyrteng kum u kyrtong Rangbah Shnong.
Ha kane ka elekshon ki don ar ngut ki kyrtong kiba ïakhun kata u Bah Kyntiewborlang Langstieh bad u Bah Ostarland Khyriem.
Hadien ba ki 51 ngut eiei ki la pyndep ïa ka jingthep vote, ki ophisar ka District Council ki la shimti ïa ka synduk ban rah sha Iingbishar kumba ka Iingbishar ka la bthah ïa ki.
U nongthoh khubor haba ïakren lyngba ka telephone ïa u Lyngdoh jong ka Hima Mawphlang u la ong ba um kwah ban kren eiei shabar namarba kane ka dei ka kam iing kam em jong ka Hima.
