Shillong, Risaw, 27: Ka jingduna jong ki nonghikai hapoh ki Government Lower Primary School kiba don ha ka jylli jong ka West Khasi Hills ka la buh jingeh ia ki nonghikai bad don ruh ki skul ha kaba uwei u nonghikai u hap ban ai jinghikai marwei tang ha kawei ka skul.
Halor kane ka jingeh kaba ki nonghikai skul ki iakynduh, ka Hynñiewtrep Youths Council (HYC) West Khasi Hills District ha ka sngi Thohdieng ka la pynsngew sha ki tyndong skhor jong u Myntri ka tnat Pule Puthi jong ka Sorkar Jylla u Rakkam A. Sangma ba un weng ia kane ka jingeh.
U President ka seng Bah Lumlang Kharsyiemlieh ha ka jingiakren bad ki lad pathai khubor hadien ka jingiakynduh ia u Myntri, u la iathuh ba ki don kumba 90 tylli ki Government L.P. School ha West Khasi Hills District bad ka jingdon jong ki khynnah ka long kumba 50 haduh 100 ngut ha manla kawei ka skul. Ha kawei ka skul, ka Sorkar ka thung nonghikai tang uwei ne arngut ban ai jinghikai sha ki khynnah bad kine ki nonghikai ki hap ban shim klas ia ki khynnah kiba pule naduh Nursery haduh Class-V.
U la ai nuksa ruh ia ka skul ha Athiabari, West Khasi Hills, watla ka dei ka Lower Primary School hynrei ka sorkar ka thung tang uwei u nonghikai na ka bynta ki khynnah Pre-primary bad une ujuh u nonghikai u hap ban shim klas ia ki khynnah na ka bynta ka skul baroh kawei.
“Ka jingbym thung ia ki nonghikai katkum ka jingdon jong ki khynnah (student-teacher ratio) ka la ktah shikatdei eh ia ka pule puthi ha ka District baroh kawei bad ka long ka jingleh shiliang ia ki khynnah skul kiba pule ha kine ki skul,” u la ong.
“Ki don ruh kumba saw tylli ki Government Upper Primary Schools hapoh ka District hynrei ia ki nonghikai ba la thung ha kine ki skul kam shym la long katkum ka jingdonkam bad kane ka pynkha pynban ia ki jingeh bad ka jingkhia jong ka kam ha ki nonghikai kiba la don lypa bad ka skul kam lah ban ai ia ka jinghikai kaba paka sha ki khynnah. Ngi kyntu ia ka Sorkar ba kan thung da ki nonghikai kiba la tbit khnang ba kan pynmyntoi ia ki khynnah,” u la ong.
Halor ka jingjot jingpei jong ki skul Sorkar, une u nongialam ka Seng, u la pyntip ha u Myntri ka tnat Pule Puthi ia ka jingdonkam ban maramot kyrkieh ia ki skul Sorkar, namarba bun na kine ki skul kin ym long shuh ban pyndonkam ha ki bnai ki ban sa wan.
Ka seng ka la dawa ruh ban pynbiang ia ki tiar namarba bun na ki skul kiba don hapoh ka district kim shym la ioh ia ki tiar katkum ki jingdonkam. “Ha kine ki skul, khamtam ha ki Lower Primary School, ki khynnah ki hap ban shong khapngiah na ka daw ka jingbyn don ki ben shong kiba biang.
Ha kaba iadei bad ka Higher Secondary Section jong ka Sib Sing Memorial Govt School kaba la plie naduh u snem 1995 ha Nongstoin, hynrei haduh mynta ka Sorkar kam pat thung nonghikai satia ha ka Higher Secondary Section na ka bynta ka Arts bad Science katkum ka jingdonkam.
“Kum ka nuksa, ym shym la thung nonghikai na ka bynta ka sobjek Mathematics bad na ka bynta kiwei kiwei ki sobjek kiba donkam ha ka Arts haduh mynta. Ki don kumba 6 ngut ki nonghikai ba la shu thung Contractual Basis bad haduh mynta ka Sorkar kam shym la shimkhia ban thung ia ki nonghikai kiba pura. Kane ka la ktah ia ki khynnah skul,” la pyntip u Bah Kharsyiemlieh.
Ha ka dorkhas ba la aiti ha u Sangma, ka HYC ka la pynpaw, halor ka building jong ka skul ba la plie ha ka 17 tarik, Kyllalyngkot mynta u snem da u Myntri Rangbah ka Jylla u Conrad K. Sangma hynrei kaba sngewsih ka long ba kane ka ing skul kam don ia ka bording elektrik ne kino kino ki tiar ban pyndonkam. Haduh mynta ia kane ka iing skul la shu ieh iingjah kumjuh.
Ka Seng ka la pynsngew ruh halor ka jingbym don ka jaka treikam bapura jong ka District School Education Officer ia kaba la shu trei na ka ophis SDSEO bad ha kajuh ka por ka seng ka la pynpaw ruh ba la donkam ban shna thymmai noh ia ka ophis SDSEO kaba la kynjoh mynta sha ka rta kaba 48 snem.
