Shillong, K’lyngkot, 09: Ka Meghalaya Commercial Truck Owner and Driver Association (MCTODA) ka la pynpaw ïa ka jingsngewkhia halor ka jingbym shah shuh jong ki bor synsar ka Ribhoi District ïa ki trok ban ieng harud surok kiba leit kit mar na ka jylla Assam.
U President ka seng u Bah Mosklander Marngar ha ka jingïakren bad ki lad pathai khubor hadien ba la wai ka jingïalang kaba la long ha ka sngi Thohdieng u la ong ba ka seng kan sa leit pynsngew ïa kane ka jingeh sha ki bor sorkar khnang ba ka Sorkar kan dup shna noh da ka Bye-Lane harud ka Surokbah National Highway-6 bad ba ki trok kit mar kin ïoh ban pynieng katba dang treikam ki kynta ba la pynjari ïa ka No Entry sha ka jylla Assam.
U la ïathuh ruh ba ka seng kan sa pan jingïarap na ka Sorkar ha kaba ïadei bad ka jingduhei ka bainong jong ki nongniah trok kiba kit ïa u khaw jong ka Food Corporation of India.
Ha kajuh ka por ka seng ka la maham tyngeh ïa ki katto katne ki nongïalam bad ïa ki dkhot jong ka seng kiba leh Dalal da kaba ailad shwa ïa ki kali kiba nabar ban ïoh leit kit mar katba ki khniot bein ïa la ki jong ki paradkhot bad ki para Khasi kiba ap laiñ ban ïoh kit mar.
U Bah Marngar u la maham ïa ki katto katne ki nongïalam bad ïa ki dkhot ba ki dei ban sangeh noh ïa ka jingleh dalal tang ban ïoh ïa ki jingmyntoi shimet.
Ha ka jingïalang ka Seng ka la ïathir ïatai ruh halor ka jingkynnoh ba ka jur bha ka jingthew tuh ïa ka umphniang diesel ha ki Petrol Pump hapoh ka jylla.
U Bah Marngar u la kyntu ïa ki trai jong ki Petrol Pump ba kim dei shuh nangne shakhmat ban leh ïa kane ka kam buit tuh hynrei ki dei ban ai ïa ka jingshakri kaba hok sha ki paidbah ha ka lynti kaba dei.
U la ong ruh ba lada kan dang ïai jia shi jia kumne ka seng kam banse ban shim da kawei pat ka lynti.
Ka seng ka la pynpaw ruh ïa ka jingsngewnguh ïa ka Iingbishar Meghalaya High Court kaba la bthah ïa ki trai Karkhana pynmih dewbilat ha East Jaiñtia Hills ban siew ïa ka dor kit mar kaba T.8 na ka bynta shi kilomitar.
