Shillong, Naitung 22: Ka Federation of Khasi Jaiñtia and Garo People (FKJGP) kaba la ïoh ïa ka jingud jingnam na ki nongrep bad na ki nongkhaii ïa ki mar rep ha ka Lah Sngi u Blei ryngkat ka jingsynran lang jong Meghalaya Trader Fresh Vegetables and Ginger Association (MTFVGA) ki la leit pynsngew ha ka Myntri kaba khmih ïa ka tnat ka Rep ka Riang ka Dr. Ampareen Lyngdoh bad ban kyrpad ruh ïa ka Sorkar jylla ba kan pynmih noh da ka ‘Road Delivery Challan’ khnang ban pyllait ïa ki kali kiba kit ïa ki mar rep na ka jingshah khrong pisa beaiñ ha ki Weight Bridge, ha Umling, Ribhoi District bad ha Ratacherra, East Jaiñtia Hills District.
U Chairman jong ka Agriculture Cell ka FKJGP u Bah Bristar Mawthoh ha ka jingïakren bad ki lad pathai khubor u la kynnoh ba ki don ki kali kiba kit ïa ki mar rep kiba shah dawa pisa naduh T.500 haduh T.1500 ha ki nongap Weight Bridge.
U la kynnoh ruh ba ki don ki riew shimkabu kiba pynap shrip ïa ki kali kiba kit ïa ki mar rep bad lada ki nongniah kali kim siew ïa ka pisa, ki kali ki shah bat da ki bun kynta bad kane ka pynslem kai ïa ki kali ban poi sha ki iew ki hat bad ha ka juh ka por ka don ruh ba ki mar rep, ki kylla pyut noh namar ka jingbym lah ban poi ha ka por kaba biang.
“Ha ka jingïalang, ngi la kyntu ruh ïa ka Myntri ban pynmih da ka ‘Road Delivery Challan’ khnang ba ki kali kit marrep, kin pyndonkam ïa kine ki Challan ban lait na ka jingshah khrong pisa beaiñ. Ka ‘Road Delivery Challan’ na ka Sorkar kan ïarap ïa ka tnat ban tip ïa ka jingdon jong ki nongrep bad ki mar rep ba la pynmih na rilum Khasi-Jaiñtia,” u la ong.
Ka FKJGP bad bad ki nongrep, ki la kyntu ïa ka Myntri ka tnat ka rep ka riang ban pynsngew lem sha ka Sorkar Jylla ba kan maramot noh ïa ka surok ha ka thaiñ Lumshnong, East Jaiñtia Hills District khnang ban pynsuk ïa ka jingpynpoi ïa ki mar rep sha ka Jylla Assam.
