Shillong, Jymmang, 09: U nongïalam ka BJP uba dei ruh u Myntri ka Sorkar Jylla Bah AL Hek ha ka sngi Thohdieng u la ong ba ïa ka jingkynnoh ba la pynmih da ka seng kieng atiar HNLC ba la shah kheiñ beaiñ pyrshah ïa u Symbud Myntri Rangbah ka jylla u Bah Sniawbhalang Dhar hap ban pynshisha da ki sakhi sabut.
“Ki jingkynnoh ki mih manla ka sngi. Mynta ka sngi kan jia ïa u (Bah Dhar) bad lashai ka lah ban jia ïa nga bad lashai ka sngi ka lah ban jia ïa kiwei”, la ong u bah Hek haba kren sha ki lad pathai khubor.
Haba kylli hato ka MDA kan khot neem ïa ka jingïalang ban ïathir halor kane ka mat, u Bah Hek u la ong ba kum ïa kine ki kam dei ban da pynshisha shwa bad haduh kata ka por ban khot ïa ka jingïalang kam don jingmut satia.
“Tang namarba ka dei ka jingkynnoh, kumno ngin khot ïa ka jingïalang,” u la buh jingkylli.
Halor ka jingdawa jong ka Liang Pyrshah ba u Bah Dhar un hiar shuki kum u Symbud Myntri Rangbah ka jylla katba dang ap ïa ka jingtohkit halor ka jingkynnoh, u Hek u la ong, “yn hap ban pynshisha shwa. Hadien ba la pynshisha yn sa lah ban shim ïa ka rai da ka MDA. Khlem kano kano ka jingpynshisha, kumno phin ong ba un hiar shuki? Kata kam dei ka rukom treikam jong ka Sorkar.”
Da kaba pynpaw ba ym shym la pyrshah ban thung ïa ka jingtohkit halor kane ka kam, u Bah Hek u la ong, “uno uno u lah ban kynnoh hynrei ngi hap ban pynshisha ïa ka. Khlem ki sabut bad khlem ki sakhi kumno phin leh (kata).”
“U Bah Sniawbhalang u don ha ka Sorkar. Kum ka sorkar MDA ngin ss don ka jingïakren hapdeng jong ngi bad ban sngewthuh ïa ka jinglong jingman. Uno uno u lah ban kynnoh bamsap hynrei phi hap ban pynshisha ïa kata. Ki sakhi ki long kiba kongsan bha,” u la pynskhem shuh shuh.
