Shillong, Jymmang, 20: Ka Khasi Hills Autonomous District Council (KHADC) ha ka sngi Baar ka la takraiñ ïa ki bor synshar ka Ribhoi District halor ka jingkhang tala ïa ka khyrdop lum khajna ha ka shnong Umdihar khlem da ai notis.
Haba pynpaw ba kane ka dei ka ‘jingibeiñ’ ïa ka iktiar jong ka Council, u nongaiktien jong ka Executive Committee ba la ïalam da ka Voice of the People Party (VPP) u Bah Powell Sohkhlet u la ong, “ngi don ïa ki khyrdop lum khajna ha manla ki district kiba hap hapoh u pud u sam jong ka Council bad kim ju ïakynduh ïa kino kino ki jingeh ha ki snem ba ladep. Dei tang mynta ynda ka VPP ka la shimti ïa ka EC ha KHADC, kane ka mat ka la paw pyrthei.”
“Kane ka pynpaw ruh ïa ki jingshisha ba ki bor synshar district ki kheiñ ïa ka KHADC kum ka sengbhalang ne Gunda, kiba lum beaiñ ïa ka pisa,” ula ong bad bynrap, “ngi sngewlyngngoh ha kane ka kynti ynda ngi la buh ïa ki khyrdop (hadien ba ladep pynthymmai), la shu khang noh mardor. Nga suba jur ba ka don eiei shalyndet ïa kane ka jingleh da ki bor synshar district. Ngim ïaroh hi ruh ïa ka jingleh jong u Magistrate uba don ha ka kamram. Kam long satia kaba lah ban pdiang namarba ngi dei ka kynhun ba la jied da u paidbah, ngim shym la pynïaid ïa ka sengbhalang ne ka kynhun Gang hangne. Kaba sngewsih ban ong ka long ba ka paw ba ki bor synshar district ka kheiñ ïa ngi kum ki nongshong shnong Second Class ne ki nongpynkheiñ aiñ. Namarkata, nga pynrem jur ïa ka jingleh jong ki bor synshar district.”
Katkum ka jingong jong u, ka khyrdop lum khajna jong ka KHADC ka long katkum ki kyndon jong ka Sixth Schedule ka Riti synshar ka ri India.
Ïa ka khyrdop lum khajna jong ka KHADC kaba don ha Umdihar la khang khyrdop ha ka 16 tarik mynta u bnai, tang shi sngi hadien ba ka la treikam.
U Executive member in-charge Trade Bah Winston Tony Lyngdoh u la ong ba ïa kane ka khyrdop la aiti ban pynïaid ha u Bah Pyndaplang Diengdoh kaba long kawei napdeng ki 11 tylli ki khyrdop ba la pynieng da ka KHADC ha ki district bapher bapher la bun bun snem.
“Ka khyrdop kam dei kaba long be-aiñ. Ngi la pynmih ïa ka work order kaba thikna hadien ba ki nongshim wai ki la ïoh ïa ka No Objection Certificate (NOC) na ka Dorbar Shnong, ki kopi ruh ladep phah sha u Ri Deputy Commissioner ka Ribhoi bad sha u Superintendent of Police, ki bym shym la kynthoh eiei hynei katba la shu phah pahara da ki Pulit ha ka 15 tarik, Jymmang haba ka khyrdop lum khajna ka la sdang ban treikam. Wat ïa ki rusit ruh la ai haba lum pisa,” u la ong.
“Tad haduh mynta, nga dang ap ïa ka jingpyntip na ki bor synshar ka Ribhoi District shwa ba ngin shim ïa ka rai halor kane ka kam. Lada ki bor synshar district ki pyrkhat ba ki khyrdop ki long kiba be-aiñ, thoh sha ngi namarba ngim shym don hangne ban pynkheiñ ïa ka aiñ,” la bynrap u Bah Lyngdoh.
U EM u la pyntip ba na ki 11 tylli ki khyrdop lum khajna, tang 7-8 tylli kiba dang treikam. “Lai tylli ki khyrdop ki la shah khang (hadien ka jingujor na ki paidbah). Ngi la phah ïa ki nongtrei jong ngi ban jurip ïa kiwei pat ki khyrdop lum khajna bad ngin sa shim ai ka rai lada ki dang treikam ne kim treikam shuh,” u la ong bad bynrap ba ka Concil ka long kaba kloi ban ïatreilang bad ka Sorkar.
Shuh shuh u Bah Lyngdoh u la ong ba um lah satia ban pynshai la ka KHADC ka la thoh ne kam pat thoh sha ka Ministry of Home Affairs (MHA) ban pan jingbit na ka bynta ban pynieng ïa ki khyrdop lum khajna bad bynrap, “hynrei ngi hap ban bud pat ïa ki kyndon katkum ka aiñ. Ki khyrdop lum khajna ba la buh da ka KHADC ki dei kiba la don lypa la bun bun snem.”
Haba bynrap halor kane, u Bah Sohkhlet u la ong ba ka KHADC ka la pynthymmai ruh ïa ka work order na ka bynta ban aiwai ïa ki khyrdop lum khajna.
“Lada ki don kum kita, (ngi donkam ban ïoh ïa ka jingbit na ka MHA), ka Sorkar Jylla ka dei ban pyntip sha ka District Council. Hynrei katkum ka jingthoh ba ngi don, kam don satia kano kano ka jingaiktien na ka Sorkar Jylla. Namarkata, ngin shim ba kine ki khyrdop ki dei kiba shong aiñ bad ngin dang bteng ban pyntreikam ïa ki kumba la leh da ki EC kiba rim,” u la ong shuh shuh.
