Shillong, Nailur 05: U Myntri ka sorkar jylla u Rakkam A Sangma u la takraiñ tyngeh ïa ki seng saiñhima kiba don ha ka liang pyrshah ba ki la pynlong saiñ pyrthei ïa ka jingïakhih ki nongtrei Garo Hills Autonomous District Council (GHADC) ha kaba ïadei bad ka jingslem ban siew tulop kaba la long mynta la kumba 44 bnai.
Ha kaba ïadei bad kane na ka liang jong u Sangma, uba dei ruh u MLA jong ka seng NPP na Siju-Rongara, u la kyntu ïa ki nongtrei kiba la mad ïa kine ki jingeh ba kin pdiang lem ïa ki rai jong ka sorkar bad ba kim dei ban shah tynjuh ha ki khwan myntoi shimet.
Haba kren sha ki lad pathai khubor ha ka sngi Thohdieng u Sangma u la pynpaw ïa ka jingsngewthuh jong u ha kaba ïadei bad ki jingeh ba ki nonghikai ki mad bad pynpaw ruh ba kane ka jingeh jong ki, ka la long kaba jynjar shisha naba kin ym ïoh tulop haduh 43 bnai ka long kaba eh shisha bad tang u Blei uba lah ban tip.
“Kane kadei ka kam kaba ka sorkar ka sngewthuh bad dei halor kane ba u Myntri Rangbah ka jylla u la pynbna ïa ka rai ha kaba ïadei bad ka jingsiew tulop ïa ki nonghikai kaba kynthup ka jingsiew tulop naduh ka 1 tarik u Naiwieng ka ban pynkhuid ïa kane ka jingeh. Ha kaba ïadei bad ka jingeh ha GHADC la dep ban pynbna ban siew noh ïa ka tulop kaba 5 bnai bad kaba sah yn siew kum ka arrear na ka pla tyngka jong ka sorkar,” ong u Sangma da kaba kyrpad ruh ïa ki nongtrei ba kin pdiang ïa ki jingtyrwa jong ka sorkar ha kaba ïadei bad kane ka bynta naba kane ka long kaba khambha,” ong u Myntri.
“Nga ka kyrpad ïa ki nongtrei ba kin pdiang lem ïa kane ka jingtyrwa jong ka sorkar naba u hynmen jong nga, u dei ruh u ba trei ha GHADC, ngi tip ïa ki jingeh jong ki bad ka ïing ka sem jong ki,” bynrap u Myntri Sorkar.
Shuh shuh na ka liang jong u Sangma u la kynnoh ba ki seng ka liang pyrshah ba kynthup ïa ka BJP bad TMC, ki la pynpaw ïa ki jingpyrshah na ki daw ba ki myntoi shimet bad na ka daw ba ka elekshon ka la wan ha jan.
“Nga sngewba kane ka jaka treikam ka la shim kabu tang na ka bynta kito kiba kwah myntoi shimet. Ki don ki riew saiñ pyrthei kiba kwah myntoi shimet bad ki kwah ban pynlong ïa kane ka jingïakhih ha ka jaka ba kin shim ïa ka rai ka ban ïarap ïa ki,” u la ong.
“Kumta ki nongtrei ki dei ban sngewthuh ba kim dei ban shah ïalam bakla ha kine ki khwan myntoi shimet. Ki riew saiñ pyrthei kiba kynthup ïa ka BJP, bad TMC kin pyrshang ban pyndonkam ïa la ki jingkhwan myntoi shimet tang ban ïoh myntoi ha ki elekshon ban wan jong ki,” u la kynnoh.
