Tura, Naitung 15: U Superintendent of Police, ka West Garo Hills, Tura, u la kyrpad ïa ka jingïarap lang jong ki paidbah ban pynithuh ïa kawei ka met ïap jong kawei ka kynthei ka bym lah ban ithuh ba la lap narud surok na ka shnong Rimtangpara, P.O. Purakhasia, West Garo Hills Meghalaya.
U SP u la ïathuh ba ïa kane ka metïap la pynkitnoh sha Tura Civil Hospital na ka bynta ban pyndep ïa ka jingkhmih bniah postmortem khnang ban pynthikna ïa ka daw jong kane ka jingïap kane ka briew. Kumba long haduh mynta ïa kane ka metïap ym pat don satia kiba la wankam kaba la buh ha kane ka hospital.
Katkum ka jingïathuh ki pulit la ong ba ïa kane ka briew kaba ym pat lah satia ban tip ïa ka kyrteng ka dei ka bar jylla, kadei ruh kaba kham raikhoh, ka jingjrong ka dei malu mala 4 phut 8 inch, ka don u shñiuh bajrong, ka phong ka patlun cotton bad ka sweater kaba rong bthuh, ka deng uwei u kynjri rupa bad ki jingdeng niam ha ryndang.
Na ka liang u Superintendent of Police u la kyntu ïa kino kino ki bahaïing hasem ne ki riew shimet kiba don jingïadei ne kiba don jingtip ban wan shakhmat bad ban kam ïa kane ka metïap hapoh 3 sngi naduh ba la pynmih ïa kane ka jingpynbna bad ki lah ruh ban Contact na ka bynta ban pyntip ne ban tohkit ha u nombar 9485025225.
