Shillong, Nailar 11 : Tang iwei arngut kiba pyrshah hynrei baroh ki Principal, ki nonghikai, ki samla pule bad ki college hapoh ka jylla kila mynjur ban iaid beit shakhmat ia ka jingpyntreikam ia ka National Education Policy (NEP) 2023. Ia kane la kam da u Vice Chancellor (VC) ka skulbah North Eastern Hills University (NEHU) u Prof. Prabha Shankar Shukla bad ula ong ba ka jingpyntreikam ia ka NEP kan wanrah ka jingmyntoi ia ki khun samla ka jylla Meghalaya.’
“Haduh mynta ngam pat ioh jingthoh na ki Principal jong ki College ba ki pyrshah ban pyntreikam ia ka NEP 2023 hynrei ki don tang iwei arngut ngut kiba pynpaw ba kim sngewiahap ban pyntreikam ia ka NEP” la ong u Prof. Prabha Shankar Shukla.
U Prof. Prabha Shankar Shukla ula ong ba kum u VC ka NEHU um don bor ban khot ia ki nongialam ka MCTA ban iakren halor ka jingpyrshah jong ki ban pyntreikam ia ka NEP naduh mynta u snem bad na ka liang ka MCTA ruh kam don bor ban pyrshah ia ki College ban pyntreikam ia ka NEP.
Ula ong ba kum u u VC ka NEHU ula lum shibun ki jingialang bad ki Principal jong ki College, ki nonghikai, ki samla pule bad ki sengbhalang hynrei haduh mynta ka MCTA kam shym la wan shakhmat ban iakren halor ka jingpyrshah jong ki ban pyntreikam ia ka NEP.
“Nga kloi ban iakren bad ka MCTA lada ki wan shakhmat hynrei haduh mynta kim shym la wan hynrei dei tang ki Principal, ki nongialam sengbhalang ba kynthup ka KSU, HYC, FKJGP bad ki samla pule ka NEHU kila wan ban iakren bad nga bad baroh kila ia mynjur ban iaid beit ia ka jingpyntreikam ia ka NEP naduh mynta u snem” ula ong.
U VC ula ong ba ka NEHU ka kloi ban iarap ia ki College ban pyntreikam noh ia ka NEP 2023 namar kane kan wanrah ka jingbha bad ka jingmyntoi ia ki khun samla ka Meghalaya bad dei namar kane baroh kila mynjur ia ka NEP.
