Shillong, Nailar, 14: Ka Hynñiewtrep Youth Council (HYC) ha ka sngi Balang ka la byrngem ban pynlong ïa ka jingïakhih lada ka State Bank of India (SBI) kam lah ban ai jingpynshai hapoh san sngi halor ka jingkynnoh thung kam ïa kiwei pat ki jaidbynriew riewlum (Schedule Tribe) jong kiwei pat ki jylla pyrshah ïa ka bhah kaba la mang kyrpang na ka bynta ki trai jylla riewlum ka Meghalaya.
Ka SBI, Central Recruitment & Promotion Department, Corporate Centre, Mumbai ka la khot ïa ki aplikeshon ban thung ïa ka kam Junior Associate (Customer Support & Sales) ha ka Clerical cadre ha State Bank of India.
Katkum ka Advertisement ba la kdew, la ong ba 77 tylli ki kam ba lait ki dei ban thep hapoh ka Jylla Meghalaya ha kaba 33 tylli ki post la buh kyrpang na ka bynta ki ST, 3 tylli ki kam ïa ki OBC, 7 tylli ki kam ïa kiba wan na ki longing ba duna ka ïoh ka kot, bad 34 tylli na ka bynta ki General Category.
Shuh shuh, ki kam ba la kdew kim don ki kyndon na ka bynta ka Inter Circle Transfer/Inter State Transfer hynrei ki dei beit ki kam jong ka Group-C.
“Ha kaba ïadei bad ka jingthung ïa kine ki kam ba lait haneng bad khamtam hapoh ka Reserved Quota kaba long 44% na ka bynta ki Schedule Tribe ka Jylla Meghalaya, la pyntip sha ngi ba la jied ïa ki kyrtong kiba dei ki riewlum jong kiwei pat ki jylla ban thungkam ha ki post ba la kdew haneng kaba la long pyrshah ïa ka bhah kyrpang jong ki riewlum jong ka Jylla Meghalaya,” ong u President ka HYC u Bah Roykupar Synrem ha ka shithi ba la aiti ha u Deputy General Manager jong ka State Bank of India, Shillong Administrative Office ha Dhankheti, Shillong.
“Kane ka rai jong ka SBI ban ai bynta ïa ki kam ba la mang kyrpang na ka bynta ki Schedule Tribe ka Jylla Meghalaya sha ki Schedule Tribe na kiwei pat ka Jylla ka dei ka jingpynduh ïa ki hok jong ki trai jylla ka Meghalaya ban ïoh jingmyntoi na kum kane ka jingbhah kyrpang bad ka long pyrshah ïa ki jingbishar bad ki hukum bapher bapher ba la pynmih da ka Ingbishar Supreme Court of India nalor ba pynkheiñ ïa ki jingbthah ba la pynmih da ka Ministry jong ka Sorkar India,” u la ong.
“Kumta, ngi dawa ba ka SBI ka dei ban ai jingshai sha ngi namar ha kano ka nongrim la thung ïa kum kane ka kam kaba pyrshah ïa ki jingbthah bad ki hukum jong ka Supreme Court bad hapoh san sngi naduh mynta ka sngi hynrei lym kumta ngin pynlong da ki prokram jingïakhih pyrshah ïa ka SBI ha ki District jong ka rilum Khasi-Jaiñtia jong ka Jylla,” bynrap u Bah Synrem.
Halor kane, ka HYC ka la pynksan ïa ka jingdawa da kaba kdew ïa ka mukotduma Marri Chandra Shekhar Rao {(1994)3 SCC 130} ba la ai jingkynthoh da ka Ingbishar Supreme Court.
Ki Bench jong ki san ngut ki nongbishar jong ka Ingbishar Supreme Court ha ka mukotduma Bir Singh vs Delhi Jal Board & Ors (Civil appeal No. 1085 of 2013) haba pynbna ïa ka rai ha ka 30 tarik, Naitung, 2018 ka la rai ba “u briew uba la ithuh kum u dkhot jong ki Scheduled Castes/ Scheduled Tribes ha ka Jylla jong u, un ïoh ïa baroh ki jingmyntoi na ka jingbuh kyrpang katkum ka Riti Synshar tang ha ka Jylla lajong tang ym sha kiwei pat ki Jylla/Union Territory bad um don hok ban ïoh ïa ki jingmyntoi na ka bhah kyrpang ha ka Jylla/Union Territory ba shu leit tang ban buhai shnong.”
