Shillong, K’lyngkot, 14: Ka Awaken India Movement ha ka sngi Baar ka la tuklar da kaba pan jingpynshai na ki bor pynïaid jong ka Shillong College ha kaba ïadei bad ka jingpynmih ïa ka Advertisement kaba tang hynriew sngi kata ha ka 22 tarik Naiwieng, 2024 haduh ka 28 tarik Naiwieng, 2024 ha kaba ïadei bad ka post Principal bad ka post Peon.
U Bah Banshai Marbaniang haba ïakren bad ka Batesi Tv u la ong ba kum ka kynhun ka la dawa ïa ki bor pynïaid jong ka College ba dei ban pynmih biang ïa ka Advertisement namarba ka jingpynmih ïa ka jingpynbna kaba tang 6 sngi khlem da bud ïa ki kyndon jong ka University Grants Commission kaba la bthah ba dei ban pynmih ïa kino kino ki jingpynbna haduh 30 sngi.
Shuh shuh u la ong ba kane ka jingdawa ka long ban wanrah ïa ka thungkam thungjam kaba khuid ba suba hynrei ym ban shu thung da ki briew kiba la don lypa.
Na ka liang jong ka Principal ka Dr. Mrs. Eva Kharkongor ka la pynshai da kaba ong ba ïa ka post Principal ka College ka la ïaid beit katkum ka UGC Regulation jong u snem 2018 bad ïa ka post Peon la leh katkum ka jingdonkam ka kyrdan pule ba la kdew da ka Sorkar Jylla.
