Shillong, Naitung 01: Ka jingther u lapbah ka lyiur naduh ka sngi u Blei uba dang bteng haduh ka Lah Sngi U Blei ka la wanrah ia ka jingtwa khyndew ha kylleng ki district jong ka jylla Meghalaya.
Kat haduh ba la pynmih ia kane ka khubor, ka Batesi TV ka la ioh lum ia ki khubor kiba iadei bad ki jingjia twa khyndew ha ki ar jaka, kata, ha ka shnong Tiehsaw ha surok Nongstoin-Shillong Highway ha kaba wat ki kali heh ruh kim lait shuh ban iaid lyngba na kane ka surok. Ki nongtrei jong ka tnat PWD (Roads) tang shu ioh jingtip halor kane, ki la rah da ka kali puhshilum ban khat ia ka khyndew kaba la hab hapdeng surok khnang ban weng ia ka jingdheng kali na ka daw ka jingtwa jong ka khyndew.
Sa kawei pat ka jingtwa khyndew ka la jia ha ka surok Lawbyrtun-Rngikseh kaba hap hapoh ka Mawthadraishan Community and Rural Developement Block, Eastern West Khasi Hills. Ka kynhun jong ki ophisar ka Block ki la leit ban pynlong ia ka jingtohkit kaba bniah.
Ha rilum Garo, ka khyndew ka la twa ha ka bynta jong ka surok Ringrey-Gandrak-Chitoktak ha kaba ka kynhun State Disaster Response Force ka la leit ban pynkhuid ia ka khyndew khnang ban pyllait ia ki kali kiba la ngat ha ka jingdheng kali hapdeng surok.
Ha ka shnong Akkongre, ka jingtwa jong ka khyndew ka la khynniat jubor ia kawei ka kali sha khap surok bad ha kane ka jingjia kam shym la don kano kano ka jingjia ba sngewsih.
Ha ka kyntoit Deran kaba don hajan ka shnong Chitoktak, Tura kawei ka ing ka la shah pynjulor na ka jingtwa jong ka khyndew.
