Shillong, Jymmang, 10: Ka Pakistan ha ka sngi Saitjaiñ ka la pynkheiñ tang hapoh khyndiat kynta ïa ka rai ban sangeh ïasiat da kaba ther kuli ha kiba bun ki jaka ha khappud bad ha u Line of Control (LoC). Ka jingpynkheiñ ka la jia tang hapoh katto katne kynta hadien ba baroh ar tylli ki la pynbna paidbah ba ki la mynjur ban pynneh ïa ka jingïasuk
Katkum ki tyllong khubor ba la ïohlum, ïa ki bor shipai BSF la bthah ba kin leh pynphai mar kylliang lada don ka jingther kuli na shiliang u pud u sam.
La ïathuh ba ki shipai jong ka Pakistan, ki la pyndonkam da ki tup ki mat kiba khlaiñbor bha ha ki bynta jong ka Akhnoor, Rajouri bad RS Pura Sector ha khappud. Ha kajuh ka por, la pyntip ruh ba ka don ka jingpynkheiñ ïa ka jingsangeh ïasiat na ka bynta jong ka Palanwalla Sector kaba don ha u LoC ha Jammu, kat haduh ba ka la pynmih ïa ka jingsngewkhia ba ka jingïakynad ka dang lah ban bteng.
Ha kajuh ka por, ki bor pahara ki la pynthikna ïa ki jingjia bapher bapher ha Kashmir. Ïa ki jingbthei bom la ïohnsgew ha Baramulla bad ki shipai ki la siat pynhap ïa kawei ka Drone kaba la suba ba ka la rung shapoh ka suiñ jong ka India. Ki khubor ki la pynpaw ruh ba la ïohi ïa kawei ka UAV ha kane ka jaka.
Nalor kata, la ïohi ruh ïa ka jingher jong ki Drone ha suiñ bneng ha Rajouri bad mar mar la pynriew ïa ka siren thma ha Samba District, Jammu kum ka jingmaham lypa ïa ki paidbah ha kane ka thaiñ.
