Shillong, K’lyngkot, 22: Ka Mawlai Town Dorbar (MTD) ha ka sngi Balang ka la pan jingmynjur na ki hynriew ngut ki kyrtong kiba ïakhun ïa ka elekshon MDC ha Mawlai Constituency ban pynlong noh tang ïa ki Common Platform bad ban pynsangeh noh ïa ka jingpynlong ïa ki jingïalang paidbah bad ïa ki jingïaid paidbah ban pynlong da ki kyrtong kumba ju long ha manla ki samoi elekshon.
Ki hynriew ngut ki kyrtong ki ban aireng ïa ka elekshon MDC na Mawlai Constituency ki kynthup ïa u MDC ba mynta u Bah Teiborlang Pathaw, u Bah Process T. Sawkmie, u Bah Seiborlang L. Nonglait kiba ïakhun kum ki Independent, ka kyrtong jong ka BJP Kong Daniella Nonglait bad u kyrtong ka VPP u Bah Eddieson Kharumniud.
U Secretary jong ka Mawlai Town Dorbar u Dr. Marco Mitri ha ka jingïakren bad u nongthoh khubor lyngba ka telephone u la ïathuh ba ka jingshim rai ka long da ka jingmynjur lang bad ki kyrtong jong ki seng saiñpyrthei bad ki kyrtong Independent kiba ïakhun ïa ka elekshon MDC na Mawlai Constituency.
“Ngi la shim lang ïa kane ka rai hadien ba ka Sorkar ka la pynbna ïa ka tarik ban pynlong ïa ka elekshon MDC namarba ka jingpynlong ïa ki jingïalang paidbah khamtam ha ka por mynmiet ka ktah palat ïa ki khynnah skul bad ki samla pule kiba pynkhreh ïa ki eksamin kut snem bapher bapher,” ong u Dr. Mitri
“Ngi la rai lang ba ki kyrtong kin ym pynlong shuh ïa ki jingïaid paidbah shwa ka sngi thep vote namarba kane ka ktah pat ïa ka leit ka wan jong ki paidbah bad ka wanrah ruh ïa ka jingdheng kali kaba jur,” la bynrap u Secretary ka MTD.
U Dr. Mitri ula ïathuh ruh ba ïa ki rai kiba bniah ba la shim ha ka jingïalang bad ki kyrtong yn sa pyntip lyngba ki lad pathai khubor ha ka sngi Palei.
