Shillong, Lber, 19: U Myntri ka Sorkar Jylla uba khmih ïa ka tnat Bording u Abu Taher Mondal ha ka sngi Balang u la kular ba ka jingthungkam (regular appointment) ha ki kam ba thylli kan sa urlong tang shu janai ka pla tyngka jong ka Meghalaya Energy Corporation Limited (MeECL).
Kane ka jingong jong u Myntri ka long hadien ba ki nongïalam jong ka Federation of Khasi Jaintia and Garo People (FKJGP) ki la dawa ïa ka tnat Bording ban pyndap noh ïa ki kam kiba lait thylli hapoh ka MeECL.
Ka FKJGP ka la dawa ba dei ban pyndap noh mardor ïa ki 130 tylli ki kam ba thylli kiba dei ki sanction post na ka bynta ka kam Assistant Executive Engineer (AEE)/Assistant Engineer (AE) bad 125 tylli ki sanction post Junior Engineer ha ka Electrical/Mechanical Cadres bad Sub Cadres, kata, ha ka Electronic bad Computor Engineer hapoh ka MePDCL.
Ka seng ka la pynpaw ruh ba ka jingsuki ban thungkam na ka bynta ka Technical Staff da ka MePDCL ym tang ba ka la pynthud ïa ka jingtreikam hynrei ka la long ruh ka jingpynduh mynsiem ïa ki hajar ngut ki samla kiba la nang la stad ki bym donkam donkam ha ka jylla.
“Kumba ka long mynta ngi don shibun ki jingeh ha ka liang ka pisa bad kane ka kam baroh kawei namarkata ngim pat ïaid shakhmat hynrei dang shen ngi la pynbna ruh ïa ka jinglait katto katne ki kam. Ïa ka Regular Appointment yn sa leh tad ynda ka MeECL ka la kham pynjanai ha ka jingdon pisa, ïa kata nga la pyntip sha ki (nongïalam ka FKJGP),” la ong shuh shuh u Mondal.
U la kubur ba ki kam ba thylli ki la don la slem bha na kiba bun ki daw.
U Myntri u la ong, “ka sorkar la bunsien ka la shong pyrkhat ym tang ïa ka MeECL hynrei wat ïa kiwei kiwei ki tnat ban peit ba ka lad thungkam dei ban ai sha ki samla jong ngi. Ngi dang leh ïa kata.”
Haba pyntip ïa ka jingdon jong ki kam ba thylli ha ka Corporation u Mondal u la ong, “ïa mynta ngi la pynbna paidbah na ka bynta ka kam Field Engineer ha ka Electrical bad Mechanical kaba don baroh 57 bad Field Eengineer for Civil 10 tylli, Field Supervisors for Electrical and Eechanical ka don 54 tylli bad Field Supervisors for Civil ka don 10, baro ki don 67 ngut ki Engineers bad 64 ngut na ka bynta ki Supervisor.”
