Shillong, Nailur, 23: Da ki hajar ngut ki paidbah ka thain Killing ki la thang ïa ka dur tyngshop jong u Jitul Deka u nongshong shnong na ka jylla Assam halor ka jingtuklar bad ka jingmushlia ïa ka khyndew ka shyiap shapoh u pud u sam jong ka jylla Meghalaya da kaba ujor mukotduma sha Iingbishar Supreme Court.
Ha ka jingïalang paidbah kaba la khot pynlong da ka All Killing Dorbar Committee (AKDC) ha madan Killing Jorbil ha ka sngi Baar la ïashim bynta lang da ki nongïalam bapher bapher kynthup ruh u Myntri ka Sorkar Jylla u Bah Sosthenes Sohtun uba long u MLA jong ka Jirang, u MLA ka Mawhati u Bah Charles Marngar, u MLA jong ka Umroi u Bah Damanbait Lamare, ka MDC jong ka Nongpoh ka Kong Rona Khymdeit, u Syiem Raid Marwet u Paiem Ken Syiem, ki Nongmihkmat na ka Hima Mylliem, ki nongïalam shnong bad ki sengbhalang na them Ribhoi.
Ka jingkhiwin jong ki paidbah ka la jia hadien ba ka Central Empowered Committee (CEC) ba la thung da ka Supreme Court ka la phah ïa ka kaiphod sha ka Iingbishar hadien ka jingleh sorjamin na ka jingujor ba la kynnoh ba ka don ka jingpynjot mariang ha ka thain khappud ka jylla Meghalaya bad Assam bad kynthup ruh ïa ka University of Science and Technology, Meghalaya (USTM).
