Shillong, Ïaïong 03: Ka Sorkar Jylla ka la thaw ïa ka All Party Committee jong baroh ki seng saiñ pyrthei ban ïasyllok bad ai jingmut halor ka kam kaba ïadei bad ka jingpynlong ïa ka nongbah tlang ne Winter Capital ha Tura, West Garo Hills bad ïa ka jingpynïasoh lynti Rel sha ka jylla Meghalaya.
Ka jingpynbna ba la pynmih da u Chief Secretary Bah DP Wahlang ha ka sngi Balang, ka ong ba kane ka Committee kan dei kaba la khlieh da u Myntri Rangbah ka Jylla lane da kino kino ki Myntri kiba u Myntri Rangbah u bynshet kam.
La bthah ba baroh ki seng saiñpyrthei kin phah kyrteng ïa arngut ki nongmihkhmat sha ka Committee. Ki tnad Sorkar ba don jingïadei kam bad kane ka kam ruh kin shah khot sha ka jingïalang ban pynlong da ka Committee.
Katkum ki kyndon treikam, la bthah ïa ka Committee ban shong bishar bad wad ïa ki lad ban pynbeit, ki lad ki lynti ban wanrah ïa ka jingshna lynti rel ha Meghalaya.
Ka Committee kan bishar ruh ïa ka jinglut jingsep ban wanrah ïa ka lynti Rel hapoh ka Jylla bad kan sa pan jingmut na baroh ki kynhun bad hadien kan sa aiti ïa ki jingai jingmut sha ka Sorkar Jylla ha kaba ïadei bad kane ka kam.
Katkum ka jingpynbna ba la pynmih da u Chief Secretary Bah DP Wahlang ha ka sngi Baar u la pyntip ba ka All Party Committee kan kynthup ïa ki seng saiñpyrthei ba la ithuh ban ïakren ïa kane ka kam kaba ïadei bad ka jingpynkha ïa ka Winter Capital ha Tura.
Ïa kane ka Committee yn sa khlieh da u Myntri Rangbah ka Jylla u Conrad K Sangma lane da u Myntri ban sa thung hi da u Myntri Rangbah.
La bthah ïa baroh ki seng saiñpyrthei ban phah arngut ki nongmihkhmat sha ka Committee bad ïa ki tnat ba dei peit ruh kin sa shah khot sha ki jingïathir ïatai ban sa pynlong da ka komiti.
Katkum ki kyndon treikam, la bthah ïa ka Committee ban bishar bniah halor ka jingtyrwa ban pynlong Winter Capital ha Tura bad ban bishar ruh ïa ki jingmyntoi bad ki jingduh jingmyntoi ban don ar tylli ki nongbah ha kawei ka jylla katkum ka jingdawa jong ki kynhun bapher bapher
“Ka Committee kan pan ïa ki jingsngew na ki kynhun bapher bapher bad ban phah ïa ka kaiphod sha ka Sorkar,” la pyntip ka Sorkar.
