Shillong, Nailur, 15: Ki Pulit ka East Khasi Hills District ha ka Lah Sngi u Blei ki la thaw da ka Special Investigation Team (SIT) ban khlieh da u Superintendent of Police (City) Bah Herbert Pynïaid Kharkongor ryngkat bad u SP ka East Khasi Hills District Bah Vivek Syiem ban pynlong ïa ka jingtohkit kaba bniah khnang ban lap dien ïa ki riew thrang snam kiba donkti ban dkhat jubor ïa ka jingim jong i heprit Insaphira Lyngdoh Mawnai.
I heprit Insaphira Lyngdoh Mawnai, 4 snem ka rta iba sah ha Nongrah Nonglum, Dong Brei, Shillong i la jah na phyllaw iing ha ka step Sngi u Blei ha ka por kumba 8 baje mynstep bad ki kmie ki kpa ki la leit ujor ruh sha ki Pulit ka Rynjah Police Station. Hynrei ïa ka met, la lap ha ka step Lah Sngi u Blei da uwei u misteri na ka iing ba dang shna ha ka shnong Nongrah, Shillong.
U Superintendent of Police jong ka East Khasi Hills u Bah Vivek Syiem ha ka jingïakren bad ki lad pathai khubor ha ka janmiet Lah Sngi u Blei u la ïathuh ba ki kmie ki kpa ki la lap tad haduh ka por 8:45 baje mynstep ba i heprit Insaphira bad ki kmie ki kpa ki la ujor ruh sha ki Pulit ka Rynjah Police Station.
“Ha ka sngi u Blei hadien ba la pyntip sha ki bor shnong, la pynlong ka jingwad shnong ryngkat ki bahainghasem, ki Pulit bad Dog Squad hynrei ym shym la lap dien satia ïa i,” la ong u SP.
“Hynrei mynta ka step, uwei u misteri u la lap ïa ka met na kawei ka ing ba dang shna. Mar mar la pyntip sha ka kynhun jong ka Forensic ban pynlong ïa ka jingtohkit. Hadien kata ïa ka met la pynkit noh sha NEIGRIHMS Hospital bad ïa ka post mortem ruh la leh hi mynta ka sngi bad ngi dang ap ïa ka kaidphod post mortem,” u la ong.
U la pyntip ba ki bahaiing hasem ki la ujor ejahar sha ki Pulit ka Rynjah Police Station halor kane ka jingjia bad ki Pulit ki la register ruh ïa ka case.
“Ngi la thaw ruh ïa ka Special Investigation Team (SIT) ban tohkit halor kane ka jingjia bad ban thwet ïa ki nongleh kam bymman,” u la ong.
“Ynda ngi la tohkit bniah bad ynda la ïoh ïa ka kaiphod Forensic, ngin sa lah ban ïohi ïa ka dur kaba shai halor kane ka jingjia,” u la ong.
Haba kylli, u SP u la ong, “tang shu sdang ïa ka jingtohkit, ka dur kaba shisha kan sa paw.”
