Shillong, Nailar 26: Ka All Khasi Meghalaya Tourist and Taxi Association (AKMTTA), ha ka sngi baar ka la pynlong ïa ka jingïashong kyllaiñ myngor ha Khyndailad ban pynsngew sha ka Sorkar ba ka dei ban wanrah noh da ka Bill ka ban khang ïa ki kali kiba wan nabar jylla ba kin leit buh ïa kiba wan jngohkai pyrthei shaduh ki jaka jngohkai naba kane ka ktah shibun ïa ka kamai kajih jong ki.
Halor kane haba kren sha ki lad pathai khubor u President ka Association u Bah Ricaldinos Dohling u la ong ba kiba ñiah tourist taxi ki la dawa ïa kane ka mat mynta la 2 snem kaba dei naduh u snem 2023 hynrei haduh mynta kam pat shym la urlong.
U la ong ba ka Sorkar kadei ban pynmih noh da ka Bill ka ban khang noh ïa ki kali tourist ba wan na shabar jylla ban kit ïa ki tourist shaduh ki tourist spot, hynrei dei ban ailad ïa kiba ñiah tourist taxi ka jylla ba kin leit kit hi ïa ki tourist shaduh ki jaka jngohkai ba ki kwah kiba don ha kane ka jylla.
U la ïathuh ruh ba ha ka jingïakynduh bad u Myntri Rangbah ka jylla u Conrad K Sangma ban pynpaw ïa kane ka jingdawa hynrei na ka liang u Myntri Rangbah u la thaw da ka Committee ha kaba la khlieh da u Bah Cyril V Diengdoh uba dang dei mynshwa kum u Director ka Tourism ha kaba la dep ban ïashong ka jingïalang haduh arsien hynrei kumba ka long haduh mynta kane kam shym la urlong.
“Ki la don kumba 35 tylli ki seng kiba la ai ka jingkyrshan ïa ka jingdawa jong ngi halor kane ka mat bad lada ka sorkar kam sngap na ka liang ka seng kan sa nang pynjur ki jingïakhih,” ong u Bah Dohling.
