Shillong, Naiwieng, 12: U Myntri ka tnad Pule Puthi ka Sorkar Jylla Bah Lahkmen Rymbui u la pynbna ha ka sngi Balang ba ka Sorkar Jylla ka la thawlad ban khanglad ïa ka jingbun ki khynnah kiba pep shiteng por ïa ki jingpule ha ki kyrdan pule kiba kham shalor bad ong ruh ba ka Sorkar ka la buh thong ban kyntiew ïa ka pule puthi ha baroh kawei ka jylla Meghalaya.
Ha ka jingïakren bad ki lad pathai khubor hadien ba la wai ka jingïalang jong ka State Higher Education Council (SHEC), u Bah Rymbui u la ong ba ka Council, ba la thaw lyngba ka 2018 Assembly Act, la pynim biang da ka jingai jingmut jong ka Sorkar bad ban khmih ïa ka jingpyntreikam ïa ki rukom treikam ba thymmai.
“Ka jingeh na ka jingbun ki khynnah kiba pep skul shiteng por ha ki jaka pule ha ka kyrdan kaba shalor ka long ka mat kaba sngewkhia bha”, la ong u Bah Rymbui haba kdew ba ka Sorkar MDA ka thawlad da kaba plie ïa ki People’s College ha ki shnong kiba jngai kum ha Shangpung, Khliehriat, Nongtalang, Mawphlang, Mawsynram, Rongkhthar, Ummahpot, da kaba seng ruh ïa ka skulbah jong ka jylla kum ka Captain Williamson Sangma State University bad ka Engineering College.
U la bynrap ruh ba ka jingkyrduh pisa ka dei kawei pat ka daw kaba pynlong ïa ka Sorkar Jylla ban kyntiew ïa ka jingsiew baibam (scholarship) sha ki khynnah skul.
Ha u snem 2020, ka Sorkar ka la pynkiew ïa ka baibam na ka bynta ka kynhun A, B, C, D na ka T. 15,000 hajar sha ka T. 35,000 hajar bad ïa ka Merit Scholarship na ka bynta ki Primary (na ka T. 100 sha ka T. 500) bad Upper Primary (na ka T. 150 sha ka T. 700).
Ïa ka Chief Minister’s Scholarship Scheme la wanrah mynta u snem khlem da buh kyndon, khnang ban weng ïa ka jingeh.
U Bah Rymbui u la pynpaw ba 82.3 % na ki khynnah skul kiba la pyndep ïa ka Class-XII ki jied ïa ka Arts, da kaba kdew ba ki khynnah skul ki duna ban jied ïa ka Science bad ka Commerce. Ban weng ïa kane, ka jylla ka la kyntiew kyrdan ïa baroh ki skul Secondary Sorkar sha ka kyrdan Higher Secondary.
Ha kaba ïadei bad ka Quality Assurance, u Myntri u la ong ba tang 25 tylli ki kolej ha Meghalaya ki dei kiba la ïoh ïa ka jingithuh da ka NAAC, katba 71 tylli ki College Aided/Unaid ki dei ki bym pat ïoh ïa ka jingithuh.
“Kumta, ngi la rai ban tyrwa ïa ka Sorkar ba kan ai pisa T. 1 klur sha ka State Higher Education Council (ban ai jingkyrshan ïa ki shlem pule kiba kwah ban ïoh jingithuh na ka NAAC),” u la ong.
U la pyntip ba yn sa pynim biang ïa ka State Level Quality Assurance Council (SLQAC) ka ban khmih ïa ka rukom ai jinghikai naduh ka Pre-primary haduh ka kyrdan University.
“Ym tang ka jinglah ban ïoh hynrei ka jinghikai kaba bha ha kiba bun ki bynta—naduh ka kyrdan Pre-primary haduh ka University, ka dei ka jingthmu ba kongsan jong ngi,” la pynkut u Bah Rymbui.
