Shillong, K’lyngkot, 31: Ka dei ka sien kaba nyngkong eh ba ki kyrtong kiba ïakhun elekshon kin ïoh ban thep kyrteng ha Pynursla naduh ba la plie ïa ka Civil Sub Division ha u snem 2017. Ki kyrtong kiba thep kyrteng ha Civil Sub Division Pynursla ki dei na ki ar tylli ki MDC konstitwensi kata na Nongshken bad Lyngkyrdem- Laitkroh konstitwensi.
U kyrtong ka seng Congress na Nongshken konstitwensi u bah Monarch Shabong bad u kyrtong ka seng Congress na Lyngkyrdem- Laitkroh u Rilang Nongkhlaw ki la wan ban thep kyrteng ha ka 31 tarik u Kyllalyngkot 2025.
Kiwei pat ki kyrtong kiba thep kyrteng ki kynthup ïa ka kyrtong ka seng Congress ka kong Grace Mary Kharpuri, kyrtong NPP na Lyngkyrdem Laitkroh u bah Rahbok Tynsong, u kyrtong ka seng UDP na Lyngkyrdem Laitkroh u bah Ryngkat Lyndem bad u bah Anthony Kongwang kyrtong ka UDP na Nongshken konstitwensi.
Ha ka sngi ba thep kyrteng kum u kyrtong jong ka seng Congress na Nongshken u Bah Monarch Shabong u la sei da ka jubab RTI ba la ïoh na ka ophis ka Khasi Hills Autonomous District Council (KHADC) kaba u la pan jingtip katno ki jaka ba ka District Council ka la ai sha ka sorkar India na ka bynta ban ker sainar shiah ha ki khappud kiba don ha Ri War hynrei ka jubab ba ïoh na ka District Council ka long ‘Ym don Jingtip’.
Halor kane u bah Monarch Shabong u la ther tyngeh da kaba ong ba kane ka pyni ba ka MDC ka Nongshken konstitwensi ka la pheil bad kam shym la leh ïa ka kamram Jong ka kum ka MDC. U la kular sha ki paid nongshong shnong ka Ri War ba Lada kin pynjop ïa u , un khynra ïa kane wat sha ka sorkar India ruh namarba ka dei ka mat kaba ïasnoh bad ka District Council.
Haba kren sha ki lad pathai khubor da ka ktien shnong lajong, u bah Shabong u la pynpaw ruh ka jingsngewsarong ba ka ktien War mynta ka la paw bha ha kylleng ka ri Khasi bad Jaintia lyngba ka jingmih ki nongrwai kiba donsap kiba pynsaphriang ïa ka ktien War lyngba ki sur jingrwai bad u la ong ba Lada shah jied kum u MDC un nang ïai pynneh pynsah ïa kane namarba ka ktien ka dei kawei na kiba pynneh pynsah ïa ka jinglong kyrpang Jong kano kano ka dong ka thain bad ka jaitbynriew hi baroh kawei.
Wat hadien ba la shah pynduh tiket ha ka seng Congress u Bah Edmund Khongngai um shym la kynriah noh na kane ka seng hynrei u dang ïai neh ban ai jingkyrshan ba radbah ïa u kyrtong Congress na Nongshken konstitwensi u bah Monarch Shabong. Une u samla na ka thain Ri War u la wan ruh ban synranlang ïa u bah Monarch ha ka por ba u wan ban thep kyrteng ha Pynursla Civil Sub Division.
Kum ban shu pynkynmaw ba u bah Edmund u dei uba la ïakhun ha ka elekshon MLA na Pynursla konstitwensi hynrei ha kato ka por u ïa khun na ka seng TMC.
