Shillong, Risaw, 24: Hynriew ngut ki kyrtong ki ban ïakhun ïa ka elekshon shiteng samoi ha Gambegre Constituency ha ka sngi Palei ki la leit ban thep kyrteng ryngkat ka jingsynran lang jong ki nongïalam bad ki nongkyrshan jong ki party bapher bapher.
Kiba la thep kyrteng ha kane ka sngi ki long ka Mehtab Chandee Sangma kaba dei ka kurim jong u Myntri Rangbah ka jylla u Conrad K Sangma ka ban aireng na ka tiket jong ka National People’s Party (NPP), u MDC ka BJP na Tura Constituency u Bernard Marak u la thep kyrteng ban ïakhun na ka BJP, u Jingjang M Marakkyrtong uba la thep kyrteng kum u kyrtong jong ka Indian National Congress (INC).
Nalor kine, ka kyrtong jong ka Trinamool Congress (TMC) ka Sadhiarani M Sangma kaba long ruh ka MDC kynthei ba marwei ha Garo Hills Autonomous District Council (GHADC) bad ka kurim jong u MLA barim ka Rangsakona u Zenith Sangma ka la thep kyrteng ha ka sngi Balang. Kum ban shu pynkynmaw, ka Sadhiarani kaba la ïakhun teng ïa ka elekshon MLA ba ladep ha Gambegre ka la shah pynliem ha u Saleng Sangma.
Katba ki arngut ki kyrtong kiba la thep kyrteng ban ïakhun kum ki Independent ki long u Sengkrabirth M. Marak bad u Jerry A. Sangma.
Ka jingpynlong ïa ka elekshon shiteng samoi ha Gambegre Constituency ka long hadien ka jingiehnoh jong u Saleng A. Sangma ïa ka kam MLA hadien ba u la shah jied kum u MP jong ka Lok Sabha na Tura.
Ka jingïathep vote ha Gambegre Constituency kan long ha ka 13 tarik, Naiwieng bad ka jingpynbna ïa ka result kan sa long ha ka 23 tarik, Naiwieng.
Ka Gambegre Constituency ka don 32,254 ngut ki nongthep vote ba kynthup ïa ki 16,331 ngut ki shynrang bad 15,923 ngut ki kynthei, 3 ngut ki service voter, 64 ngut ki nongthep vote ba la tymmen, 100 ngut ki nongthep vote kiba don jingduna ha ki dkhot met.
Na ki 51 tylli ki polling station, 31 tylli la ithuh kum ki polling station kiba kham jynjar ha ka leit ka wan.
