Mawkyrwat, Rymphang, 17: U State Secretary jong ka National Peoples Party (NPP) u Bah Kitborlang Nongrem u la ther tyngeh ïa u President rangbah jong ka Voice of the People Party (VPP) Bah Ardent Miller Basaïawmoit ha ka jingïalang paidbah ha ka shnong Mawthynrew-Rangthong, South West Khasi Hills District kaba la long ha ka sngi Saitjaiñ jong ka taiew baladep.
U Bah Nongrem u la kynnoh ba u Bah Ardent u lapmiet tang ban wohdaw wohdong ïa ki katto katne ki lad pathai khubor kiba la paw ha ka jylla Meghalaya kiba dei ruh ki lad pathai khubor kiba ai ka jingshakri ïa ki paidbah kumjuh ruh kiba la aikam aijam ïa kiba ki samla lyngba kine ki lad pathai khubor pynban u Bah Ardent u la kynthoh ktah mationg ïa ki lad pathai khubor da kaba kynnoh ba ki dei ki “Paid News.
“Nga ïohi shai hashwa ka elekshon MP bad ka elekshon MDC ba mynta ki don bun ki Youtuber ne ki News Channel kiba kamai spah da ka jingkynthoh briew kiba long kita ki sangot kiba ïarap ban pyrta ïa ka VPP kiba ki briew ki tip shai kdar ba kita ki briew ki ïoh ïa ka kata ka khusnam da ka tiket MDC na ka VPP,” la kynnoh u Bah Nongrem.
U la ong ba ka NPP wat hapdeng ki jingshah kynthoh hynrei ka trei beit la ka kam na ka bynta ka roi ka par jong ki paidbah bad kam shym la heh tang ka tyngam ban ong ieid jaitbynriew hynrei ryngkat ki kam ba ka leh.
“Hato dei tang u Bah Ardent mo ba ieid ïa ka jaitbynriew? Ka NPP ha ka jingïalam jong u Conrad K.Sangma naduh ba ka la ïoh ban thaw Sorkar ïa ka Sorkar MDA-1 bad ka MDA-II ngi la ïoh jingkyrkhu kaba khraw hapoh Ranikor Constituency ba ngi la ïoh ïa ka Civil Sub-division ha ka por ba u Martin M.Danggo u dang long u MLA bad kumjuh shibun ki aiñ kiba ïada ïa ka jaitbynriew, kum ïa ka khyndew ka syiap, ka longkur longjait, ki Aiñ ban ïada ne ban pynkhlaiñ ïa ki Rangbah Shnong, ïa ki Seng samla bad kiwei. Hato kita kim dei ki kam na ka bynta ka jaidbynriew, hato don mo u bym ieid ïalade, ïa ka shnong bad ïa ka jaidbynriew,” la buh jingkylli u Bah Nongrem.
