Shillong, Jylliew, 10: U Myntri ka Sorkar Pdeng uba khmih ïa ka tnad Ports, Shipping & Waterways u Sarbananda Sonowal,, u la pyrshah jur ïa ka jingkynthoh jong ka seng Congress ïa ka jingtreikam jong ka Sorkar Modi ha kine ki 11 snem ba ladep, da kaba ong, “ka party kaba la rim bha ka la duh ïa ka hok ban kynthoh.”
Haba ban jur ïa ka jingkiew kaba pynkylla dur hapoh ka jingïalam jong u Myntri Rangbahduh ka ri u Narendra Modi, u Sonowal u la ong ba ka Congress kaba la leh bymsuidniew ïa ki jingangnud jong ki paidbah la palat hynriew phew snem, mynta ka ieng hakhmat ka India kaba thymmai kaba ai khusnam ïa ka jingtreikam bad kaba pynshitom ïa ka jingbym shimkhia.
“Ka Congress ka la duh ïa baroh ki hok. Ki la pynpulom ïa ka jingkyrmen jong ka thaiñ shatei lammihngi haba ki la synshar bakla ïa ka ri la palat hynriew phew snem. Ki sngi jong ki jingeh hapoh ki sorkar Congress ki la dap da ki jingïaumsnam, ki kam pyntriem, ki kam thombor kiba la ïalam ïa ka thaiñ ba itynnad jong ngi sha ka jingduh jingkyrmen, jingpynjot, jingbym ïasngewthuh jingmut bad jingïapher. Ka shongsuk shongsaiñ ka la long ka jingphohsniew. Ïa kane la pynphai kylla tang da ka jingïalam ba shlur jong u Myntri Rangbahduh u Narendra Modi ji uba la shim ïa ki sienjam ba radbah ban pynkylla dur ïa kane ka thaiñ bad ban pynlong ïa ka kum ka kor jong ka roi ka par jong ka India bathymmai,”la ong u Sonowal.
Ha ka jingïakren ha ka jingïalang bad ki lad pathai khubor, u Sonowal u la pynpaw ïa ki jingjop ba kongsan jong ka sorkar ba la ïalam da u Narendra Modi ha kine ki 11 snem bad u la batai kumno ka la pynpoi ïa ki jingmyntoi bym pat ju jia mynno mynno ruh sha man la ki bynta jong ka imlang sahlang – ban kyntiew ïa kiba duk ‘Garib Kalyan’, ban pynkupbor ïa ki kynthei ‘Nari Shakti’, ka jingpynkylla ïa ka rep ka riang ‘Krishak Kalyan’ bad ban pynkupbor ïa ki samla lyngba ki jinghikai kiba pynshong nongrim ha ki sap ki phong bad ki lad ïoh kam ïoh jam watla ka jingtreikam jong ki polisi ba thymmai lyngba ki campaign Start Up India lane ka Digital India. U Sonowal u la pynshai ruh kumno palat 2.19 lak ngut ki nongrep ki la ïoh jingmyntoi na ka Mission Organic Value Chain Development, la thaw 434 tylli ki Farmer Producer Organisation (FPO), kaba kynthup 1.73 lak hectare.
U la ong, “hapoh ka jingïalam ba shlur jong u Modi, ka Sorkar ka trei ban tei ïa ka Viksit Bharat ha kane ka Amrit ka la da kaba pynleit jingmut ha ka ‘Seva, Sushasan bad Garib Kalyan’ (Ka Jingshakri, Ka Jingsynshar Babha bad ka bha ka miat ïa kiba duk ba suk). Palat 81 klur ngut ki briew mynta ki ïoh ei ïa ki mar bam hapoh ka PM Garib Kalyan Anna Yojana, palat 15 klur ki longïing ha ki jaka nongkyndong ki ïoh ïa ka kor um hapoh ka ‘Har Ghar Jal’, bad T. 3.7 lak klur la ai sha ki nongrep lyngba ka PM-KISAN. Ka jingpynkupbor ïa ki kynthei ka la ïohi ïa ki jingkiew kiba phylla-na ka jingbuh kyrpang 33% ha ki ïing dorbar thawaiñ hapoh ka Nari Shakti Vandan Adhiniyam haduh ki jingphah beit beit ïa ki jingmyntoi sha palat 3.9 klur ngut ki longkmie kiba armet, bad ka jingpdiang ba kongsan ïa ki kynthei sha ka National Defence Academy (NDA).”
Naduh u snem 2014, ka Sorkar Modi ka la wanrah ïa ka thaiñ shatei lammihngi ha ki kam jong ka ri na ka bynta ka roi ka par jong ka India da ka jingbei tyngka kaba ym pat ju jia mynno mynno ruh bad ka jingpynleit jingmut kaba thikna. Ka thaiñ shatei lammihngi ka la paw kum ka jingkylla ha kaba ‘Ki kam lehnoh ki la hiar da 64% naduh u snem 2014, la weng noh ïa ka AFSPA na 75% jong ka thaiñ’, la bynrap shuh shuh u Sonowal.
Ka sorkar ka la mynjur palat 3,600 tylli ki projek kiba shongdor T. 44,859 klur, la tei 10 tylli ki kad liengsuiñ bathymmai, bad pynïar ïa ka jingpynïasoh bad ka rukom rep ka bym pyndonkam dawai lyngba ki kam ba la buh kyrpang. “Hapoh ka jingïalam jong u Modi, ïa ka thaiñ Shatei Lammihngi la pynkylla ha kaba kam dei shuh ka jaka kaba jngai, hynrei kum ka Khyrdop ba kongsan jong ka India sha ka thaiñ Mihngi, ryngkat bad ka shongsuk shongsaiñ, ka jingkiew shaphrang, bad ka jingseisoh ha ka tynrai jong ka”, la ong shuh shuh u Sonowal.
U Sonowal u la pynpaw ïa ki lad ki lynti kiba khraw jong ka kam jngohkai pyrthei ha kane ka thaiñ. Ka jingroi kaba la ïalam da ka kam jngohkai pyrthei ka la long kum u rishot ba kongsan jong ka roi ka par jong ka jylla Meghalaya hapoh ka sorkar jong u Myntri Rangbahduh ka ri u Narendra Modi.
“Ka Shillong ka dei ka nongbah kaba itynnad, ka Meghalaya ka dei ka jingai sngewbha jong ka Mei Mariang. Ngi dei ban rakhe shisha ïa ka bad ban pynthikna ïa ka roi ka par kaba ïaineh lyngba ka jingpyndonkam ïa ki lad ki lynti kiba khraw ha ka liang ka kam jngohkai pyrthei. Ka jingkiew jong ka kam jngohkai pyrthei ha ka jylla ka dei ka dak kaba bha namar ka Meghalaya ka la kylla long ka jaka ba ki nongjngohkai na ka ri bad kylleng ka pyrthei ki jied ban wan kai sha India. Ka Jylla Meghalaya ka long ka nuksa ba bha jong ka jingjop ki skhim kum ka Swadesh Darshan. Ka sorkar Modi ka la mynjur T.244 klur ban kyntiew ïa ka kam jngohkai pyrthei kaba ïaineh kaba la plie ïa ka lad ha ki jaka jngohkai pyrthei ba pawnam kum ka pung Umium, Lum Sohpetbneng, Kshaid Krang Suri, ki krem Siju, bad ka Nokrek Reserve kiba la pynkylla sha ki jaka jngohkai kiba pawnam ha ka pyrthei. Naduh ki lynti ïaid kjat sha ki kshaid haduh ka jingpeit ïa ki krem Meghalayan Age, ka jingpynleit jingmut halor ka kam jngohkai pyrthei kaba neh bad kaba ïar ka la pynim biang ïa ka ïoh ka kot jong ki thaiñ bad plie ki lad kamai kajih. Ki jaka kiba ïadei bad ka jingngeit bad ka pateng kum ki shnong Nartiang bad Mawphlang ruh ki shah kyntiew hapoh ki kyrdan jngohkai pyrthei ba kyrpang, kaba buh ïa ka Meghalaya kum ka jaka jngohkai pyrthei kaba biang bha hapoh ka thaiñ shatei lam mihngi jong ka ri India,” u la ong.
Ki sienjam ba kongsan kum ka jingseng ïa ka jaka sumar ïa ka jingpang cancer kaba heh tam ha South Asia ha Assam ki pynpaw ïa ka jingkut jingmut jong ka sorkar ban pynbeit ïa ka jingbym shimkhia kaba la neh da ki phew snem. Ka Rising North East Investors Summit 2025 kaba dang shen ka la pynskhem shuh shuh ïa kane ka jingthmu, da kaba pynthikna ïa ka T.4.3 lak klur ha ki jingkular ban bei tyngka ka ban plie lad ïa ka ïoh ka kot jong ka thaiñ bad ban pynmih ki lad kam ba bun.
“Da ki phew snem hapoh ki sorkar Congress, ka thaiñ shatei lammihngi ka la sahkut ha ka jingsahdien, hynrei hapoh ka jingïalam jong u Myntri Rangbahduh ka ri Narendra Modi, ka thaiñ ka la sngewthuh ïa ka bor ba shisha jong ka ban long ka jaka pdeng jong ka roi ka par, ka jingpynïasoh, bad ka lad. Ka jingheh jong ka jingbei tyngka bad ka jingkylla kaba ngi ïohi mynta ka pynpaw ïa ka jingkut jingmut kaba skhem jong ngi ïa ki briew jong ka thaiñ Shatei lammihngi,”la ong u Sonowal.
Ka thaiñ shatei lammihngi ka sakhi ïa ka jingkiew kaba stet ha ka jingpynïasoh, ka rep ka riang, bad ki kam karkhana. Ki kad liengsuin kiba treikam ki la kiew na ka 9 tylli ha u snem 2014 sha 19 tylli ha u 2024. Ka thaiñ ka dang kiew kum ka jaka pdeng na ka bynta ka rukom rep organic bad ka jingpynmih umphniang bam, ha kaba ki don 3.3 lak ngut ki nonglum bad palat 19,000 tylli ki SHG kiba la kyrshan hapoh ka Van Dhan Vikas Yojana. Ka kam ba ïadei bad ki siej ruh ka la kiew lyngba ka jingpynkylla kyrdan bad ki thong ba la thmu. Ki lad ai jingsumar bad ka jingpynneh pynsah ïa ka pateng ruh ki long kiba kongsan. Ki sienjam ba ïadei bad ka kolshor ki kynthup ïa ka tribal museum ha Manipur bad ka jingkyntiew ïa ka Sivasagar kum ka heritage site.
Haba kren halor ka jingïarap pisa sha ka jylla Meghalaya, u Sonowal u la ong, “ka jylla Meghalaya, kaba la kyrshan da ka jingkiew kaba 105% ha ka central grant-in-aid, ka la ïohi ïa ka jingkiew kaba khraw ha ki jingdon jingem & ka bha ka miat ha ka imlang sahlang. Ki sienjam ba kongsan ki kynthup ïa ka Greenfield High-Speed Corridor kaba T. 22,864 klur hapdeng Mawlyngkhung & Panchgram, kaba la khreh ban kyntiew shibun ïa ka jingpynïasoh ïa ki kam logistic ha ka thaiñ. Palat 540 km ki surok bah jong ka ri la shna, bad ki projek ka leit ka wan ha ki jaka sor ha New Shillong bad Tura la pyntreikam hapoh ka PM-DevINE.”
Ki jingïarap na ka bynta ka post-metric scholarships na ka bynta palat 76,000 ngut ki samla pule SC/ST/OBC, T. 2,331 klur ba la ai lyngba ki ram MUDRA, bad ka jingkiew lai shah ha ka jingbei tyngka jong ka National Health Mission (NHM) ka la pynkupbor ïa ki briew ha kylleng ka Jylla Meghalaya. Kine ki mawmer ki pyni ïa ka jingkular ba khlem artatien jong ka sorkar Modi na ka bynta ka roi ka par kaba kynthup lang, ka jingpynkupbor ïa ka ïoh ka kot, bad ka jingpynïasoh ïa ki thaiñ jong ka thaiñ shatei lammihngi.
La synranlang ïa u Sonowal da u Myntri ka Sorkar Jylla u Bah AL Hek, State President ka BJP (Meghalaya)u Rikman G Momin, u MLA ka BJP Bah Sanbor Shullai bad ki nongkitkam ka BJP.
