Shillong, Naiwieng, 26: Ka Sorkar Meghalaya ka la shim ïa ka jaka ha ka shnong Jongsha, East Khasi Hills District na ka bynta ka projek Public-Private Partnership (PPP) ban kyntiew ïa ki kam jngohkai pythei da kaba thmu ban tei ïa ka 5-Star Hotel bad ïa ka Resort.
“Ïa kane ka jaka ladep thied bad ka Sorkar bad ka Kynhun Myntri ki la mynjur ban ïaid shakhmat bad ladep khot ïa ka Expression of Interest (EoI), ki briew ki la ïashim bynta, la thaw ïa ka komiti bad halor kata ka jingïakren la buh ïa ka jingtyrwa ba khatduh hakhmat ka Kynhun Myntri kaba la ai ïa ka jingmynjur,” la ïathuh u Myntri Rangbah ka Jylla hadien ba la wai ka jingïalang jong ka Kynhun Myntri ha ka sngi Balang.
U la ïathuh ba ka Sorkar ka dang wad ïa ki jaka jngohkai kiba kongsan kum ka Jongsha, Laitlum, Nongjrong bad Syntung na ka bynta ban pyntreikam ïa ki projek jngohkai pyrthei ban shna ïa ki Hotel kiba heh lyngba ka Private-ublic Partnership.
“Ngi la sngew ba ka donkam ban don ka jaka jngohkai pyrthei kaba bha bad ka hotel 5-star ha kine ka jaka bad kumta ka donkam ïa ka sorkar ban thied jaka (ha Jongsha),” bynrap biang u Sangma.
Nalor kata, ka Sorkar ka la mynjur ban thied jaka ha Umden, ka jaka jngohkai pyrthei kaba dang kiew, da kaba mang pisa T.50 klur na ka bynta ban shna surok na Nongpoh.
“Ngi la mynjur ruh ban thied jaka ha ka thaiñ Umden, kaba dei ka thaiñ kaba dang kiew kum ka jaka jngohkai pyrthei. Ngi la mynjur T. 50 klur na ka bynta ka surok ban shna na Umden sha Nongpoh bad ka Umden ka dei ka shnong ba la thaiñ Ryndia kaba ki briew kiba nabar ki smat bha ban leit jngohkai. Ka la don ka jingdawa na ki nongshong shnong ba ka Sorkar ka dei ban shna ïa ka ïingbasa. Ban pynurlong ïa kata, ngi la ïaid shakhmat bad mynjur katkum ka jingtyrwa ba la ai da ka tnad ba ka sorkar kan thied jaka,” la ong u Sangma.
Ka Kynhun Myntri ka la mynjur ruh ïa ka Service Rules jong ka tnat Sports and Youth Affairs.
“Ka tnad kam shym la don ïa ka Services Rules haduh mynta bad khatduh ïawai ngi la mynjur bad ka Service Rules ka long hi kumba long ha kiwei pat ki tnad,” la bynrap u Sangma.
