Shillong, Nailar, 03: Ka Federation of Khasi Jaiñtia and Garo People (FKJGP) ha ka sngi Palei ka la ia kynduh ia u Myntri ka tnat Animal Husbandry u Bah Alexander L. Hek ban pynpaw ka jingpyrshah ia ka jingthmu jong ka Sorkar ban ai jaka ha Upper Shillong na ka bynta ban pynkynriah ia ka Petrol Pump na ka thaiñ Anjalee.
Ha ka jingiakren bad ki lad pathai khubor u President jong ka FKJGP Upper Shillong Circle u samla Kitboklang Nongphlang ula ong ba ka seng ka la ioh jingtip ba ka la don ka jingleit jurip sop sop hapdeng ki ophisar ka tnat Veterinary bad ki trai jong ka Petrol Pump kaba don ha Anjalee ia ka jaka kaba don ha Upper Shillong.
U la ong ba ka seng kam pyrshah ban pynkynriah ia ka Petrol Pump sha kawei ka jaka hynrei ka seng kan ieng pyrshah ban ai jaka ha Upper Shillong namarba ka seng ka sngew ba ka dang donkam ia ka tnat Animal Husbandry and Veterinary ban tei ia ki ophis na ka bynta ban kyntiew ia ka kam ri jingri ym ban ai jingmyntoi ia ka Petrol Pump.
Haba kylli, u samla Kitbok u la iathuh ba u Myntri ka tnat Animal Husbandry and Veterinary u la iathuh ba ia kane ka kam la peit hi da ka tnat Urban Affairs kaba la shu bthah ia ka tnat Animal Husbandry and Veterinary ban pynpeit jaka ha Upper Shillong.
Ula ong ba ka seng kan sa buddien ia kane ban pynthikna ba ki bar jylla kim dei ban ioh jaka khamtam ha Upper Shillong bad ong ruh ba ka seng ka sa iakynduh ia u Myntri Rangbah ka jylla ban pynpaw ia ka jingpyrshah.
