Shillong, K’lyngkot, 19: Ka Hynñiewtrep Integrated Territorial Organisation (HITO) ka la pynpaw ïa ka jingpyrshah, da kaba kyntu ïa ka Sorkar Jylla ba bishar bniah biang ïa ka jingthmu ban ïasoi ïa ka soskular ïasngewthuh jingmut (Memorandum of Understanding) bad ka Karnataka Cooperative Society na ka bynta ka kam ri syiar bad ri sniang, kaba la thmu ban ïasoi ha ka 23 tarik mynta u bnai.
Ha ka shithi ba la thoh sha u Myntri Rangbah ka jylla u Conrad K. Sangma ha ka sngi U Blei ïa kaba la soi da u Vice President u Bah Shaniah Nongrum bad u General Secretary u Bah Wanbun Dkhar, ka seng ka la pynpaw ïa ka jingsngewkhia ha kaba ïadei bad ka MoU hapdeng ka sorkar Meghalaya bad ka Karnataka Cooperative Society.
Ka HITO ka la pynpaw ba ka jingpyrshah ka long halor ka jingbym shai, ka jingbym don ka jingïamir jingmut bad ki paidbah, bad ka jingbym pyrkhat bha ïa ka bha ka miat jong ki paidbah ka jylla. Ka seng ka la kyntu ïa ka Sorkar ban bishar bniah biang ïa ka jingthmu bad ban buh hakhmat eh ïa ka jingïakren ba don jingmut bad ki paidbah bad ki nongmihkhmat paidbah.
Ki mat kiba ka HITO ka la pynpaw ka long, ka jingbym don ka jingïamir jingmut bad ki paidbah: Ka rai ban ïaid shakhmat ïa kane ka soskular ka long khlem da pan jingmut na ki paidbah. Kane ka jingbym khein snep ïa ka jingïamir jingmut ka pynduh ïa ki nongrim jong ka synshar paidbah bad ïa ka hok jong ki nongshong shnong ban ïoh jingtip bad ban ïadon bynta ha ki mat kiba ktah ïa ka trei ka ktah bad ka kamai kajih jong ki.
Ka jingbym don ka jingïatai nia ha ka ïingdorbar Thaw aiñ: Ka long kaba sngewkhia shibun ba ïa ki kyndon jong kane ka soskular ym shym la rah ban ïatai ha ka ïingdorbar Thaw aiñ. Kum kine ki mat kiba kongsan ki dawa ïa ka jingpeit bniah, ka jingïatai, bad ka jingïasngewthuh jingmut ban pynthikna ïa ka jingkitkhlieh bad ka jingkhuid ha ka synshar ka khadar.
Ka jingsynshar bym shai: Ka jingbym don ka jingshai ha ka soskular ka buh ïa u dak jingkylli shaphang ki jingthmu ba kongsan jong ka Sorkar. Ki nongshong shnong ka jylla Meghalaya ki deihok ban ïoh jingtip bad pynthikna ba ïa ka bha ka miat jong ki la buh halor ki jingmyntoi kiba na shabar.
Ka seng ka la byrngem ban mih sha surok ban pynthikna ba yn pynneh ïa ka hok synshar paidbah” lada ym lah ban pynbeit ïa ki jingeh jong ki.
“Ngi shaniah ba ka jingsynshar jong phi kan pynpaw ïa ka jingstad bad ka jingshemphang da kaba sngap ïa ka sur jong ki paidbah kiba phi shakri,” la bynrap ka seng.
