Shillong, Lber 21: Ka Sorkar Jylla ka la pyntip ba ka la thmu ban wan ïalam lut ïa baroh 22 ngut ki khynnah kiba la kem pang na ka jingbam ia ka bam ba la sah ha Mandya, Karnataka.
ïa kane la ïathuh da u Commissioner & Secretary ka tnad Home (Police) u Bah Cyril Diengdoh ha ka sngi Thohdieng haba kren sha ki lad pathai khubor.
U Bah Diengdoh ula ong, “ka jingthmu ka long ban wan ïalam noh ïa ki sha Jylla Meghalaya.”
“Hynrei, kine ki khynnah skul ki dei kiba pule ha ki klas bapher bapher, don kiba pule ha ka klas V bad don pule klas VII bad ki hap ban ïakhun ïa ka eksamin lym kumta kin duhei ïa kane ka shisnem. Kumta, u Deputy Commissioner ka Mandya ula pyrshang ban pynbeit ba kumno kine ki khynnah skul kin ïoh ban thoh ïa ka eksamin bad kane ka dei kaba ki la pynpaw bad khlem pep ki bor synshar district ki la kren ïa ki kmie kpa bad hadien ba pyndep ïa ki kam ki jam katkum ka aiñ, ngin sa wanrah noh ïa ki sha Jylla,” ula bynrap.
Haba kylli, u Bah Diengdoh ula ong, “kat haduh mynta ka sngi, nga dang ïakren bad u Deputy Commissioner ka Mandya District. La pyntip ba ki khynnah ki dang don ha hospital bad la shimkhia ban khmih ïa ki da ki bor khmih ka Hospital. Ka Child Welfare Committee jong ka District ruh ka la ïakren bad ki bor hospital khnang ba kin pynbiang ïa baroh ki jingdonkam jong kine ki khynnah”.
U la pyntip ba ki Deputy Commissioner ha Meghalaya ruh la bthah ba kin pynlait noh ïa ka pisa ba mar T. 3 lak sha ki bahaïing hasem jong ki arngut ki khynnah kiba khlad noh ha kine ki sngi ba la leit.
U Bah Diengdoh uba dang shu wan phai shen na Karnataka, ula pyntip ruh ba ki bor District bad ki Pulit ki ladep ujor da ka ejahar bad hynriew ngut ki briew ki la shah kem kynthup ïa u briew ba pynïaid ïa ka skul bad ïa ka hostel beaiñ, u trai ka restaurant bad u cook.
“Ka jingtohkit kan ïaid katkum ka lynti jong ka aiñ. Ïa ka ejahar la dep ban register bad ka aiñ kan ïaid ha la ka jong ka lynti,” la pyntip u Bah Diengdoh.
