Shillong, Jymmang 31: Ka Federation of Khasi Jaiñtia and Garo People (FKJGP) Garo Hills Region ha ka sngi Thohdieng ka la thoh sha u Myntri Rangbah ka Jylla u Conrad K Sangma ban phah tuklar ha kaba ïadei bad ka jingduna Seat ha ka Class XI ha ki skul pule Sorkar.
Ha ka shithi ba la phah sha u Myntri Rangbah, ka FKJGP ka la ong ba ha ka 5 tarik, Ïaiong, 2025 ka Meghalaya Board of School Education (MBoSE) ka la pynbna ïa ka result jong ka Secondary School Leaving Certificate bad kumba 80% na ki khynnah kiba ïakhun ïa ka eksamin ki la pas bha.
Ka seng ka la pynpaw ba ka jingpass kaba kynjoh 80% ka la pynmih ïa ka jingeh ha kaba ïadei bad ka jingduna Seat ban ïoh rung ha ka Class XI ha ki skul Sorkar, khamtam ha Tura.
Ka seng ka la kam ruh ba ki don ym duna 300-500 ngut ki samla pule kiba la angnud ban ïoh admission ha ki jaka pule Sorkar ha Tura.
“Ki jaka pule jong ki riewshimet bad ki Semi Private ki dang don jaka ban ïoh Admission na ka bynta Class XI hynrei kane ka pynartatien ïa ki samla ban shim Admission ha kumne ki jaka pule namar ka jingrem ka bai Class bad lada ka Sorkar Jylla kam shim ïa kino kino ki sienjam, ki samla pule kin hap ban sangeh noh ïa ki pule jong ki,” ong ka FKJGP.
Ban weng ïa ka jingeh ha kaba ïadei bad ka jingduna seat na ka bynta ka Admission ha ka Class XI, ka FKJGP ka la kyntu ïa u Myntri Rangbah ka Jylla ban wad ki lad lynti ban sdang noh da ka Morning Shift bad ka Evening Shift ha ki jaka pule ha Tura.
“Ngi kwah ban ai jingmut ban sdang noh da ka Morning Shift bad Evening Shift bad ban bthah ïa ki jaka pule ban bud ïa ka rukom pdiang ïa ka bai Class kaba kham ïasyriem bad ka Tura Government College, Tura kum ka jingai sngewbha ka Sorkar Meghalaya sha ka imlang sahlang khamtam ïa ki samla pule jong ka Jylla bad ka thaiñ Garo khamtam,” la ong ka seng ha ka shithi.
Ka seng ka la kyntu ruh ïa u Myntri Rangbah ban ai jingïarap bai Admission ha ki skul bad ban pyllait ïa ka bai rung manla u bnai ha ki jaka pule shimet ne ki jaka pule Semi Private.
“Ka dei ruh ka jingpeit bniah jong ngi ba ki samla pule kim sngew artatien ha ka jingshisha ban ïoh rung ha ki jaka pule shimet bad jaka pule Semi Private hynrei namar ka jingeh ha ka liang ka ïoh ka kot ki samla pule kim lah ban ïoh rung ha kine ki jaka pule shimet bad Semi Private. Ngi kyntu ïa ka Sorkar Jylla ban bishar bniah halor kane ka jingai jingmut,” la ong ka seng.
Ha kaba ïadei bad ka jingpyntreikam ïa ka National Educational Policy (NEP) ha Meghalaya, ka FKJGP ka la pynpaw ba ym dei ban pyntreikam ïa ka NEP ha ka Jylla khlem da pynbiang shwa ïa ki jingdonkam kynthup ïa ki jingtei kiba donkam, ka jingthung ïa ki nonghikai bad ka jingpynkhreh ha baroh ki liang.
“Ngi pynpaw ïa kane ka jingmut namarba la pynsngew tyngeh ïa ngi da ki samla pule, ki nonghikai, ki riewshempang bad ki nongtrei na ka tnat Pule Puthi ba ka jingkylla sha ka rukom treikam jong ka NEP ha kane ka por kan kham pynsniew ïa ka jinglong jingman jong ka pule puthi baroh kawei jong ka Meghalaya ban ïa kaba ai jingmyntoi,” la bynrap shuh shuh ka Seng.
Nalor kane, ka FKJGP ka la kyntu ïa ka Sorkar jylla ban sdang ïa ki sienjam ban ai jingkyrshan ïa ki samla pule kiba rung ha ki Trade School.
