Shillong, Ïaïong 10: Ka Hynñiewtrep Youth Council (HYC) ha ka sngi Palei ka la kyrpad ïa ka jingtuklar jong u Myntri ka sorkar pdeng uba khmih ïa ka tnat Health & Family Welfare u JP Nadda ban pynskhem ïa ka jingpyntreikam jong ka North Eastern Indira Gandhi Regional Institutes of Health & Medical Sciences (NEIGRIHMS) ha kaba ïadei bad ka jingthungkam thungjam 80:20 ratio ia ki female-male nurse.
Ha ka shithi sha u Nadda, u President ka HYC u Bah Roykupar Synrem u la ong, “Ngi kyrpad jur ïa phi ban pymih ïa ki jingbthah ban pynskhem da ka Ministry sha ka NEIGRIHMS ban pyntreikam ïa ki kyndon ka 80:20 Female: Male nurse ha kaba ïadei bad ka jingthungkam da ka Central Institute Body ka AIIMS, New Delhi bad kumjuh ruh kiwei ki jaka pule kiba hab hapoh ka jingpeit jong ka Ministry of Health & Family Welfare, ka sorkar India.”
U la ong ba ka NEIGRIHMS lyngba ka Advertisement kaba la pymih ha ka 22 tarik u Kyllalyngkot, 2025 ka la khot ban pyndap ïa ki kam kiba lait jong ki 105 ki Post ka Nursing Officer. Hynrei ka khlem pynshai pat ïa ka ratio jong ki shynrang kiba dei ban trei kum ki Nurse kiba dei ban shah thungkam.
U Bah Synrem u la pyntip ba ka NEIGRIHMS ka la dep thoh sha ka Ministry of Health & Family Welfare ha ka 9 tarik u Naitung, 2024 ban ïoh ka jingmynjur na ka Ministry ban pyntreikam ïa ka kyndon 80:20 Female: Male nurse kumba la pyntreikam da ka Central Institute Body ka AIIMS, New Delhi bad kumjuh ruh kiwei ki jaka pule kiba dang hab hapoh ka jingpeit jong ka sorkar pdeng ne kum ki hospital ESIC ba kynthup ïa ki jaka pule ba kongsan kum ka JIPMER ha kaba 80% na ki kam Nursing Officer la bhah na ka bynta ki kynthei.
“Kane ka jingai jingmut jong ka Ministry ym tang ba kan ktah ïa ki rukom pynïaid kam ka NEIGRIHMS hynrei wat ïa ki nongpang kiba wan phah sumar ha kane ka jaka,” bynrap u Bah Roy.
Katkum ka jingïathuh jong u, u la ong ba ka NEIGRIHMS ka don 40 tylli ki tnat (department ne area) ha kaba la thung ïa ki Nursing Officer bad tang 3 tylli na kine ki tnat ki dei ki male ward.
Shuh shuh u Bah Synrem u la kdew ruh ba ki ward kum ka PICU/ICU, ki longkmie ne ki nongpang kynthei kim sngew tynnad ban shah sumar ha ki nurse shynrang ha ka por ba ki dang kha khun ne ban ai buiñ ïa ki khun.
Ha kajuh ka por na ka liang ka HYC ka la aiti ruh ïa ka dorkhas sha u Lat ka jylla u CH Vijayashankar ban kyrpad lang ïa u ba un tuklar ha kaba ïadei bad kane ka kam.
