Shillong, Naiwieng, 02: Ha ka rta kaba 75 snem, u Bah Reniwell Majaw u la lah ban pynmih ïa ka kot poitri kaba u la ai kyrteng, “Syrwet ba la jah” ban pynriewspah ïa ka thoh ka pule ha ka jaidbynriew Khasi.
Ïa kane ka kot poitri “ki Syrwet ba la jah” la pyllait paidbah ha ka sngi Saitjaiñ ha ka jingïalang kaba la long ha iingsah jong u Bah Reniwell ha Mawlai Nongpdeng, Shillong da ka Prof. (Dr.) Streamlet Dkhar kaba la long kum ka Kongsan ryngkat ka jingsakhi lang jong u Rangbah Shnong ka Mawlai Nongpdeng u Bah Kitkupar Kharshiing, u Rangbah Shnong barim u Bah Phling Khongsit, ki bahaing hasem jong u Bah Reniwell Majaw bad kiwei kiwei kiba la shah khot sngewbha.
Ka Prof. Streamlet Dkhar, haba kren ha kane ka sngi ka la ong ba ka ktien ka long kaba ïar. “Hynrei kaba sngewsih ka long ba ngi klet ban pyndonkam ïa ki kyntien jong ka ktien tynrai lajong bad ngi kren bujli noh da ka ktien nongwei. Ki kyntien ki lah ban long ha ka ktien Phareng ne Hindi ne Sanskrit.”
Haba sot ïa ki kyntien jong u Rev. Hopewell Elias Khariong SDB, “Im ka ktien, im ka jaidbynriew”, ka Prof. Streamlet ka la ong ba ka ktien ka dei kaba ngi pyndonkam ha ka thoh ka pule bad ha kaba ngi kren ruh.
Katkum ka jingong jong ka, ka ktien ba manla ka sngi ka im lada ngi dang ïai kren hynrei ka ktien thoh kan dang ïai im wat hadien ba ïap noh ha ka thoh ka pule bad ki nongpule kin nang ïai bteng ban pule na kawei ka pateng sha kawei pat ka pateng.
Ka Prof. Streamlet ka la ong ba ka thong jong u Bah Reniwel Majaw ban thoh ïa ka kot poitri ha ka dur jong ka kot ka long ban rah shajrong ïa ka ktien Khasi lyngba ki jingthoh ki jong u.
“Lada ma ngi ruh ngi don shisha ïa ka jingangnud naduh ka mynsiem ngi lah ban leh ïa kata khamtam ha kaba thoh ne pynmih ïa kino kino ki jingthoh ha ka dur jong ka kot,” ka la bynrap.
Ka la ong ruh ba u Bah Reniwell wat ha ka rta kaba la noh hynrei um shym la shongthait ban thang ïa u sai sharak na ka bynta ban pyndep ïa ka jingangnud da ka jingkyrshan lem jong ki bahaing hasem.
“Lada phi don ïa ka bor ban pyrkhat kaba khlaiñ, ka met kaba koit kaba khiah nang ïai pynmih ïa ki kot khnang ba kiwei kin dup tip ïa ka sur jong ka dohnud jong phi,” la ong ka Prof. Streamlet.
Ka la pynpaw ruh ïa ka jingsngewsih ban ïohi ba ki samla ha kane ka pateng ba mynta kim don jingtip shuh ïa ki ktien Khasi tynrai kiba lah ban pynroi bad pynriewspah shuh shuh ïa ka ktien Khasi.
Shuh shuh ka la ong ba ka Ktien Khasi ka don bun ki adverb bad ki Adjective hynrei lada ngim pyndonkam borabor ïa ki, khlempep kin sa jah noh.
Ka la ong ba lada ki briew ki pule ïa ki Nobel ba la thoh da ka ktien Phareng bad ki peit ruh ïa ki phlim Phareng, ki dei ruh ban pule ïa ki Kot Khasi khnang ban kyntiew ym tang ïa ki nongthoh hynrei kumjuh ruh ïa ka ktien Khasi.
U Bah Reniwell Majaw haduh mynta u la pynmih haduh 4 tylli ki kot kiba la thoh tang kum u nongsumar dawai kynbat Khasi.
