Shillong, Rymphang, 11: U Chief Executive Member jong ka Khasi Hills Autonomous District Council u Bah Pynïaid Sing Syiem ha ka 11 tarik Rymphang, 2025 u la aiti da ka jingthoh sha ka Deputy Commisioner jong ka East Khasi Hills District ka Kong RM Kurbah ban pynpaw halor ka jingmih kyrteng jong kiwei ki jaidbynriew bym dei riewlum bad ki jaidbynriew riewlum na kiwei ki jylla kiba shu wan buhai shnong ha East Khasi Hills kiba paw kyrteng ha ka Electoral Roll jong ka Khasi Hills Autonomous District Council.
Haba kren sha ki lad pathai khubor u Bah Pynïaid u la ong ba ka jingdawa ïa ka Deputy Commissioner ka long ban weng noh ïa ki kyrteng jong kiwei ki jaidbynriew na ka Electoral Roll.
Namar ka jingbym ïakynduh ïa ka Deputy Commissioner u Bah Pynïaid u la ong ba un ap ïa ka jubab na ka ophis jong ka Deputy Commissioner halor kane ka jingujor jong u.
